Staff nurse lakna lehkha hal

ZPM Ṭhalai chuan, nimin khan an pisa tualah ZMC-a thawk tur staff nurse 50 lak a nih dan duh lohna lantirna atan staff nurse lakna lehkha an hal.

ZPM Ṭhalai sr. vice president Dr C Lalrammawia chuan, "Vawiinah hian he hun hi political party angin hmang mah ila, kan thinlungah chuan Mizoram khua leh tui kan nihna avâng zawkin kan rawn che chhuâk a ni," a ti.

Dr C Lalrammawia chuan, Covid-19 in Mizoram min rawn nuai ṭan aṭangin hripui do tura a hmatawnga thawk tura nunna thapa inpete staff nurse laknaah hnuchhawn an ni chu mak an tih thu sawiin, "Volunteer-te thinlung natzia kan hre zo lo chungin, kan rilru a lo na hle a ni," a ti, staff nurse lakna order chu sut an phut thu a sawi.

Nurse lakna an kalpui danah Health minister Dr R Lalthangliana leh Medical Operation Team chairman Dr ZR Thiamsanga an dem thu sawiin Dr C Lalrammawia chuan "Volunteer-te kuhmumah par an chhuah a, a tuam mawitute zung phawi saka an awm hi pawi kan ti takzet a ni," a ti.

ZPM Ṭhalai hian staff nurse 50 lakna hnukkir tura ngenna Chief Minister, Health Minister leh Medical Operation Team Chairman hnenah thehluh an tum a ni.