Faina Hapta hman chhunzawm zel a ni

October 2, Inrinni aṭanga ṭan Faina Hapta, 2021 chu district hrang hrangah ruahmanna siam sa angin kalpui mek a ni a, Faina Hapta hi October 8, Zirtawpni thleng hman tur a ni.

Nimin khan Lungleiah Faina Hapta ni li-na hman a ni a, khaw chhung leh veng chhung tih fai hnatlang thawh nan ruahman a ni. A hmun loa bawlhhlawh paihtute ngaihhnathiam loh ni (No Tolerance Day for Waste Disposal) hman nghal a ni.

Serchhipah pawh veng hrang hrangte'n vantlang hmun tihfai hnatlang an buatsaih bakah District Sanitation Task Force-te'n khawlai fangin dan bawhchhiate an vai.

Lawngtlaiah pawh No Tolerance Day leh khaw chhung tihfai hnatlang neih ni atan hman a ni a, dan bawhchhiate chu The Lawngtlai Town Solid Waste Management Bye-Laws, 2019 leh The Lawngtlai Town Plastic Waste Management Bye-Laws, 2019 hmangin hrem zel an ni.