Serchhip Vety. Hospital hawng

Animal Husbandry & Veterinary (AH&Vety) minister Dr K Beichhua chuan, nimin khan Rural Infrastructure Development Fund- NABARD aṭanga cheng nuai 90 senga sak Serchhip District Veterinary Hospital a hawng.

Dr K Beichhua chuan hripui leng karah sorkarin theihtawp chhuahin hmasawnna hna a thawk tih sawiin,"Chung zinga pakhat chu Serchhip District Vety Hospital hi a ni. Tun hmaa dispensary ni ṭhin vawiina hospital a lo ni ta leh building thar ṭha tak lo awm ta hi mellung pawimawh tak a ni," a ti.

An sorkar tirh aṭangin sa-ah, a bikin vawk sa-ah Mizoram a intodelh theih nan nasa takin hma an la nia sawiin Minister chuan,"Vanduaithlak tak maiin African Swine Fever (ASF) natnain min chim buai zui ta a, pumpelh ngei tumin sorkarin beihpui thlak mah se kan dang zo ta lo a ni," a ti a, sorkarin himna dan a siam zawm ṭha lote vanga ASF chu lo lut a ang hle tih a sawi.

Dr K Beichhua chuan sorkar laipuiah amah ngeiin ASF zangnadawmna a dil thu te, tun hnaiah dispensary paruk chu hospital leh rural animal health centre 35 chu dispensary-ah hlan kai a nih thute a sawi bawk.

AH&Vety Minister hi Vety & Sericul-ture board vice chairman C Lalmuanpuia, MLA in a ṭawiawm a ni.

He huna tarlan danin Serchhip District Veterinary Hospital hi RIFD-XXIII (NABARD) sum cheng nuai 90 hmangin Malsawm Construction & Consultancy Service, Kulikawn, Aizawl in an sa a, a dung feet 57 leh a vang feet 30 a zau a ni.