CEO in by-election neihna tur tlawh

Chief Electoral Officer (CEO) P Jawahar chuan nimin khan Tuirial bial by-election neihna tur Lungdai, Serkhan, Horto­ki, Kawnpui leh Thing­dawla polling station, Kolasib-a counting hall leh strong room-te a endik a, Kolasib DC conference hall-ah election official, political party leh NGO aiawhte a kawm nghal.

Kolasib DC conference hall-a inkawmnaah CEO P Jawahar chuan Mizorama electoral roll-a la chuang Bru vote nei, Tripura-a letleh tate chu roll aṭanga paih vek an nih theih nan Mizoram chhunga political party leh NGO hrang hrang aṭanga ngaihdan an lakkhawmte nen Election Commission of India-ah thlen a nih tawh thu a sawi.

Hrileng kara inthlanna kalpui tur a nih angin candidate-te chu Covid-19 vaccine (full dose) la an nih loh chuan RT-PCR test negative an nih a ṭul thu sawiin CEO chuan,"Vote thlak turte hnenah kutkawr sem tur a ni a, vote thlak ni a darkar hnuhnung ber tlai dar 5 leh dar 6 inkar chu hri kaite vote thlak hun atan a ruahman tur a ni. Covid-19 positive vote thlak tur an awm chuan polling station-a duty-te'n PPE hak vek tur a ni," a ti.

P Jawahar sawi danin, Election Commission of India phut angin can­didate zingah thubuai nei tawh an awm a nih chuan candidate tura tihchian an nih aṭanga darkar 48 chhunga tlangzarh tur a ni.