Virtual Anthurium Festival October 28 & 29-ah neih a ni dawn

Tourism minister Robert Romawia Royte hoin nimin khan a pisaah sorkar hotute'n kumina Virtual Anthurium Festival hman dan tur an sawiho a, October 28 leh 29-ah Vanapa Hall-ah hman nise an ti.

Robert Romawia chuan Anthurium Festival chu kum tin ropui taka buatsaih ṭhin a nih thu a sawi a,"Kum kalta aṭangin Mizoramah Covid-19 hripui a len tak avang leh sorkarin inkhuahkhirhna a kalpui chhoh tak zel avangin mipui nawlpui nen a huhoa hman a rem lo," a ti.

Tourism tihhma­sawnna turin sorkar laipuiin state-te hnenah kum tin festival hmanna tur pawisa a pek ṭhin thu sawiin Robert Romawia chuan,"Anthurium Fes-tival pawh hi chutianga sorkar laipui aṭanga sum hmuh hmanga buatsaih ṭhin a ni. Hmasawnna hna thawh nan emaw, Covid-19 do letna atana hman leh pawh pen theih a ni lo," a ti bawk.

Meeting chuan covid appropriate behaviour (CAB) leh sorkar inkaih-hruaina zawm chungin Anthurium Festival chu Vanapa Hall-ah October 28 & 29, 2021 hian neih ni se an ti a; a hman dan tur kimchang duang turin Tourism Secretary kaihhruai Virtual Anthurium Festival Programme Committee an din nghal bawk.