Covid-19 vangin mi pali thih belh

October 5 Thawhlehni tlai dar 5 aṭanga nimin tlai dar 5 thleng khan Covid-19 vangin mi pali an thi a, Covid-19 vanga Mizorama thi chu 336 an tling tawh.

Matthew FC Beireithai (nausen thla khat mi), New Colony-I, Siaha chu October 4, Thawhṭanni khan hri a kai tih hriat chhuah a ni a, hemi ni vek hian Siaha DCHC-ah a thi a ni.

Lalzuiliana (81), Chaltlang chu October 5, Thawhlehni zan dar 6:45 khan ZMC-ah a thi a, natna dang nei sa a ni. September 25-ah hri a kai tih hriat niin October 1 khan ZMC-ah dahluh a ni.

Thawhlehni zan dar 8 khan Zoramchhanmawii (73), Bungkawn chu ZMC-ah a thi a, natna dang nei tel a ni. September 19 khan hri a kai tih hriatchhuah niin September 20 khan ZMC-ah admit a ni.

KL Nghaka (66), Tuikual North chu nimin zing dar 6:50 khan ZMC-ah a thi a, natna dang neisa a ni. September 26 khan hri a kai tih hriatchhuah niin September 30 khan ZMC-ah dahluh a ni.