KHAWTHLIR

Thisen pe
Hrangbana College NSS chuan nimin khan an college hall-ah thisen pek an huaihawt leh a, Aizawl Civil Hospital tan thisen unit 85 an pe a, petute mipa 69 leh hmeichhia 16 an ni. Hrangbana College NSS hian October 5, Thawhlehni khan thisen unit 65 an lo pe tawh a, vawiinah pawh pek leh an tum a ni.

Jubilee sawiho
Mizoram Legislative Assembly Golden Jubilee Souvenir Sub-Committee chu nimin khan an chairman Lalrinawma, deputy speaker kaihhruaiin nimin khan Assembly Secretariat committee room-ah an ṭhukhawm a; May 10, 2022-a Mizoram Legislative Assembly kum 50-na lo thleng tur lawmna souvenir, jubilee lungphun, exhibition buatsaih leh jubilee logo insiamsiak chungchang an sawiho.

Heroin man
Excise & Narcotics department chuan Thawhlehni chawhnu khan Bawngkawn, Durtlang road-ah heroin gram 308 (hawng 26) leh a neitu nia puh Lalmalsawma (36) s/o Lalliankima (L), Saipum khua, tuna Durtlang Dawrkawn Venga mi in luaha khawsa mek nia inchhal an man.

Kuhva rah man
Assam Rifle, Serchhip Bn. leh Champhai Custom ṭangkawp chuan nimin khan Ruantlangah Myanmar aṭanga dan loa rawn kal kuhva rah bag 48 an man . Kuhva rah hi Rs. 12,21,120 man hu a ni.

Meizial tichhia
Siaha district Legal Metrology Enforcement Squad leh District Anti Tobacco Squad-te'n Siaha leh Lawngtlai khawpui aṭanga dan loa zawrh ramdang meizial (cigarette) bawm 5,580 an man chu nimin khan Siaha District Anti Tobacco Squad chairman Kesavan R, bawrhsap hoin tihchhiat a ni. Meizial tihchhiatte hi Legal Metrology Act & Rules - a bawma a siamtu company hming, maximum retail price (MRP) leh thil ṭul dang inziah loh vanga man an ni.