Serchhip district dinhmun sawifiah
Serchhip DC Dr Lalzirmawia Chhangte chuan nimin khan DC meeting room-ah thuthar thehdarhtute a kâwm a; an district-ah Covid-19 vei pakhat an neih thu sawiin, an district dinhmun tlangpui a sawifiah.
Dr Lalzirmawia Chhangte chuan, state páwn aṭanga haw, June 4, 2020-a Serchhip district thleng zing mi pakhat, kum 35-40 inkar mi chu throat swab sample enfiahna aṭangin Covid-19 vei a ni tih hmuh a nih thu a sawi a, "Tun dinhmunah a taksaah harsatna a nei lo. Serchhip a rawn thlenin nawmsam lohna a neih avangin quarantine centre-ah dah loin room hrang, toilet, bathroom leh thil dangte mi dang nena inhman pawlh theih lohna tur isolation centre-ah dah a ni. Isolation centre-a dah ve tho mi dang zawng chu an result a negative vek," a ti.
Serchhip district mi tangkhang hawte chu fimkhur taka dawnsawn vek a nih thu sawiin Serchhip DC chuan, "Mipui tan chiaina tur a awm lo. Chutih laiin, fimkhur loh leh inthlahdah avangin awlsam taka darh thei a ni a, kan invenna ṭha ber chu thuawih a ni. Inkhàrkhip chhungin mipuite thuawih taka inkhung turin ka chah a ni," a ti.
DC hian mipuite chu thu belhchian dâwl lo thehdarh kawnga fimkhur tur leh mipui tichiai thei thu dik lo thehdarh chu jail tan theihna a ni tih hre reng turin a chah a ni.