ZPM CM candidate - Lalduhoma Kan innghahna tur chu Isua Krista - Duhoma

Ṭangrual pawl, Zoram Peoples' Movement (ZPM) chuan, kumina Mizorama Assembly inthlanpuia an chief ministerial candidate tur chu Zoram Nationalist Party (ZNP) president Lalduhoma a nih thu nimin khan an puang. Lalduhoma chuan, an innghahna tur chu Isua Krista a nih thu a sawi.

ZPM hian nimin khan Chanmari YMA Hall-ah CM candidate tur puan inkhawm an buatsaih a; ZPM chairman Lalliansawta'n kaihruaiin, ZPM Val Upa Council (VUC) chairman Lalfakzuala'n ZPM CM candidate tur a puang a ni.

Lalfakzuala chuan, ZPM chuan mipui sorkar, kalphung thar sorkar a din dawn tih sawiin, "Pawl leh sorkar vil tur Val Upa Council a nei ringawt pawh hi kalphung thar a ni a, VUC-in CM candidate tur a thlang pawh hi kalphung thar tho a ni," a ti.

ZPM CM candidate Lalduhoma chuan, ram hmasawnna atan ram hausak ringawt a tâwk lo tih sawiin, "Ram hausaah pawh hruaitu an ṭhat loh chuan mirethei an chêng

ṭhin. Sum neih tam ringawt hi hmasawnna a ni lo. Hruaitu lû ber an pawimawh khawp mai. MLA candidate ṭha tak tak awm mah se, an hruaitu lu ber a ṭhat loh chuan vote loh ngam a ngai," a ti a; hruaitu ṭha tehna atan an rorel rei chhung emaw, tlin rei lam ni loin, an hun chhunga an thil tih a pawimawh thu a sawi.

Ram hmasawnna atan sorkar kalphung thar a pawimawh tih sawiin Duhoma chuan, "Kan kalphung tur chu hruaitute'n an duang tawh. ZPM innghahna tur chu Isua Krista a ni. Khawvel ram tin hian an sakhua chu an politics lungphûmah an hmang ṭheuh. India hi Krista ramah siam kan tum. BJP pawhin India ram hi Hindu ramah siam an tum a, min sawisel thei bik lo ang. Kan sorkar chuan Aizawl khawpui hi 'Biak-in Khawpui' (City of Church)-ah kan puang ang," a ti.

Lalduhoma chuan, Pathian leh mipui zara sorkarna an siam a, chief minister a ni tak tak a nih chuan amah vanga mipuite'n an tawrh a phal ngai dawn loh thu sawiin, "Ram hruaitute bawhchhiatna avang hian ram leilung leh a chhunga chêng mihring leh nungchate lamin an tuar ṭhin. Kei pawh hi mi chak lo, ti sual thei ka ni," a ti a; thil a ti sual palh a nih chuan, 'Ka chungah ngei hremna chu thleng rawh se' tih chu a ṭawngṭaina a nih tur thu a sawi.

Zu zawrh chungchangah Lalduhoma chuan, "Sorkarna kan siam a nih chuan zu zuar lo turin ZPM Steering Committee-in thutlukna a lo siam tawh. Hnam dang nen intehkhin phâk kan la ni lo. Hnam dang angin zu in kan la thiam lo a, zu zawrh hi kan la tlin lo. Zu zawrh vangin ni tin sum a nuai tél state páwnah a luang ral a, economically pawhin kan ram tan a ṭha lo," a ti.

Lalduhoma chuan, politics zinkawng chhuk chho tak zawhin a vahvaih thu sawiin, "Ka nupui fanaute pawhin an tuar nasa em em a. Pathian hian training hautak zet mai min paltlangtir a, rawh tuina meipuiah min paih lut ni berin ka hre ṭhin. Tunah chuan upat lam kan lo hnaih ve ta dêr mai. Chuvangin, vawiinah hian, mimal ang pawhin, mipuite lainatna leh khawngaihna ka ngen che u a ni," a ti a; Pathian malsawmna leh mipuite duhsakna zarah ZPM chuan mipuite super chief minister pek an tiam thu a sawi.

Thu sawitu dang Rev. Dr K Thanzauva chuan, ZPM siam tum ram tharah kalphung thar an ken luh dawn thu sawiin, "Kalphung thar chu mipui sorkar a ni ang. Kan economy policy chu central leh mi khawngaihnaa innghat ni loin, intodelh economy-ah kan lut dawn. Intluk tlanna leh hlim tlanna ram a ni tawh ang," a ti a; ram tharah chuan education system pawh a danglam tur thu a sawi.

Rev.Dr K Thanzauva chuan, ZPM CM candidate Lalduhoma'n Lok Sabha MP a nih laiin politics lama a ngaihdante lehkhathawnin a hrilh thu a sawi a, "Pawl hrang hrangah a insawn an ti ṭhin. A lehkha min thawn ka thlirlet hian, politics-a a ngaihdan leh a duh dan a la sawhsawn ngai loin ka hria," a ti.

MPC vice president Vanlalhlana pawhin thu sawiin, pa pahnihin ram an kaihhruai danah mipui an mangang tawh niin a sawi a, "Zirlaite pawh ram humhalhna atan an pên chhuah a ṭul tawh. MNF leh Congress tel lohna sorkar siam turin Ṭangrual Pawl a ding a ni. Mi hmingṭha leh mi thiam, hlemhle lo tur candidate kan dap a ni," a ti a; candidate tur mi eng emaw zat an hmuh tawh thu a sawi.

Report petu ZPM general secretary K Sapdanga sawi danin, ZPM a din hnuah district, block leh local level-ah ZPM Steering Committee leh local body eng emaw zat a ding tawh a; ZPM hmunpuiin a pawmpui tawh 76 awmin, la pawmpui chiah loh eng emaw zat a awm. VUC-te chu MLA candiate tur an ni lo a, sorkar khalh ngiltu tur an ni.