Sports Incentive Cash Award sem

Mizorama infiammi, ram páwn leh ram chhunga medal late hnen­ah nimin khan Lal Than­hawla Auditorium-ah Sports Incentive Cash Award sem a ni a, Sports & Youth Services minister Zodintluanga'n a dawngtute hnenah a hlân.

Sports Minister chuan, khawvel hmun hrang hrangah Mizo infiammite India aiawhin an kal ṭhin tih sawiin, "Taekwondo team-ah Mizo tam tak an kal leh dawn a, Youth Olympics-ah pawh Mizo an tel ve leh ngei a beiseiawm. Sports discipline hrang hrangah Mizote chu India hma hruaitu niin, football-ah phei chuan India rama club ṭhate'n Mizo tlangvalte tel loin an khel thei tawh lo," a ti.

Sports Incentive Cash Ward hi kum 2001-02 ah sem ṭan a ni a, chumi ṭum chuan boxer Jenny R Lalremliani chauhin a dawng. Kum 2001 aṭanga 2016 thleng khan mi 4,423 hnenah Rs. 35,85,52,300 sem a ni tawh a; nimina an sem lehnaah hian kum 2016-2018 chhunga lawmman dawng pha mi 890 hnenah Rs. 1,73,00,000 sem a ni.

Kum 2016-17 chhung­in incentive cash award dawng thei mi 373 awmin, chung zingah chuan Aizawl district an tam ber a, mi 307 an dawng.

Kum 2017-18 chhungin in­centive cash award dawng thei mi 521 an awm a, mi 412 chu Aizawl district chhunga infiammite an ni. Kum 2016-17 award hi sport dis­cipline 18-ah sem a ni a, 2017-18 award chu disci­pline 19-ah sem a ni thung.