Vanglaini logo

Ṭawipui South-ah total bandh neih a ni

Ṭawipui South Joint Action Committee (JAC) chuan, an thil phût chi hrang hrang tipuitling tura sorkar kar nan nimin zing dar 5 aṭang khan an khuaah darkar 48 awh tur total bandh an huaihawt. Bandh vang hian buaina a chhuak hriat a ni lo.

Thu dawn danin, Tawipui S' JAC-te thil phûtte chu - an khuaa Rural Development (RD) Block dah te, an khaw sikula zirtirtu indaih lohna phuhru tura zirtirtu dah belh leh, Police outpost dahte a ni.

Total bandh vang hian Ṭawipui S' khuaa zirna in zawng zawng, dawrte leh pisate khâr vek a ni a, páwnah mi chhuak­vâk an awm lo. National Highway 54, Lunglei aṭanga chhim lam, Lawngtlai district leh Siaha district panna kawngpui dan chah a ni. Chhim lam aṭanga kal lirthei pariat leh hmar lam aṭanga kal lirthei 12 an táng.

Ṭawipui S' JAC hotute hnen aṭanga thu dawn danin, Total bandh hi darkar 48 awh tur a ni a, sorkar aṭanga thu lawmawm an dawn loh chuan vawiinah pawh chhunzawm tur niin, he thu ziah lai thleng hian sorkar aṭangin thu an la dawng lo.

JAC-te chu an khaw luhna kawtchhuah pahnihah an duty a; Buaina chhuak thei veng turin Lunglei aṭangin magistrate leh SDPO hoin police-te an kal a ni.

Ṭawipui South khawtlangin total bandh huaihawt an tum chungchangah hian Lunglei DC Dr Ankita Chakravarty chuan May 7, Thawh­ṭanni khan a pisaah Ṭawipui S' JAC hruai­tute a kâwm a, bandh neih an tum chu ṭhulh turin a ngen.

Lunglei Bawrhsap chuan, Ṭawipui S' khawtlang mamawh leh har­sat­nate sorkarin a hria tih sawiin, "Keimah ngeiin School Education department hotute leh sorkar hotu dangte ka sawipui tawh a, Ṭawi­pui 'S High School-a headmaster dah turin sorkarin theihtawpin hma a la mek a ni," a ti.

Lunglei DC chuan, total bandh huai­hawt a nih chuan Lunglei district bakah, Lawngtlai district leh Siaha district mipuiin harsatna an tâwk dawn tih sawiin, Ṭawipui S' JAC-te chu total bandh huaihawt an tum ṭhulh turin a ngen a ni. Ṭawipui S' JAC-te chu an khuaa an haw hnuah Bawrhsap ngenna an ngaihtuah a, Bawrhsap thusawi chu innghahna tlaka an ngaih loh avangin bandh huaihawt an titlang ta a ni.