KHAWTHLIR

Kal phal lo
Aizawl SP C Lalzahngoa chuan thupek chhuahin, PWD-in vawiin aṭangin Sihhmui leh Lengpui inkar Tlawng lei (bailey bridge) siamṭhat hna an thawh chhunzawm dawn avangin, thu leh awm hma chuan he kawngah hian lirthei tlan tlang theih a ni dawn lo tih a puang a, "Lengpui pan tur leh Lengpui aṭanga Aizawl pan turte chu Buichali lamah kal tur a ni," a ti.

Tarmit pe
National Programme for Control of Blindness and Visual Impairment hnuaiah Kolasib district chhunga kum upa mi 108-te chu nimin khan Kolasib-a Chief Medical officer pisa conference hall-ah a thlawnin tarmit pek an ni. He hunah hian kum upate hi a thlawnin an mit endiksak an ni a, mi 40 inentirin, mit zai ngai mi pakuate chu Dr Zoremmawii'n a thlawnin a zaisak nghal a ni.

ASHA training
National Health Mission chuan, nimin khan Champhai IPR Auditorium-ah ASHA Refresher Training an buatsaih a, NHM mission director Dr Lalrozama'n a hawng. Training hian May 18, 2018 thleng a awh dawn a; ASHA-te chu hna thawh tur leh hriat tur pawimawh te, nau pai enfiah dan te, nau nei tura inbuatsaih dan te, naupang leh nu hriselnate leh home visit neih dan turte zirtir an ni.

Rangkachak man
Champhai police -te chuan May 7, Thawhṭanni tlai khan Champhai aṭanga km. 12-a hla, Hruaikâwn khaw pêngah Zokhawthar-Aizawl maxicab service MZ-01 J-7822 aṭangin rangkachak kg. 9.96 an man.Police thuchhuah tarlan danin, rangkachak man hi Zohmahruaia (51) s/o Hrangthan­chhunga, Zokhawthar ta nia hriat a ni a, police-te chuan rangachak neitua puh leh motor khalhtu thubuai an siamsak. Rangkachak hi tual­chhunga hralhna ang ­chuan cheng nuai 318.85 hû a ni.