Scheme thar SSA budget cheng vbc. 208.29
Nimin tlai khan School Education directorate conference hall-ah Samagra Shiksha Abhiyan (SSA) Annual Work Plan & Budget 2018-19 thlirho a ni a, School Education minister H Rohluna’n a hmanpui. SSA scheme thar atana Mizoramin kum 2018-19 chhunga sum a hmuh tur chu cheng vbc. 208.29 a nih thu tarlan a ni.
H Rohluna chuan, zirna atana ṭangkai tur thil chi hrang hrang a chhuak zel tih sawiin, "Tunah pawh scheme awmsa pathumte chu Samagra Shiksha Abhiyan hnuaiah an awm dawn ta a, he scheme thar hi thawktute inpekna avangin ṭha taka kalpui theih ka beisei," a ti a; Mizoram zirna siamṭhatna kawngah theihtawp chhuah zel turin department hotte a chah.
School Education secretary Esther Lal Ruatkimi pawhin thu sawiin, sorkar laipui aṭanga scheme lo kalte chu bawhzui ṭhat a tul thu leh data leh report-te a hun taka pek a ṭul thu a sawi a; SSA scheme thar atana sorkar laipuiin Mizoram a pek theih tura ruahman chu cheng vbc. 208.29 a nih thu a sawi bawk.
Meeting-ah hian School Education director K Lalthawmmawia leh SCERT director Laldawngliani Chawngthu ten SSA scheme thar atana inbuatsaihna leh hmalaknate an sawi a ni.
Samagra Shiksha Abhiyan hi School Education tana integrated scheme thar a ni a; a hmaa scheme awm sa SSA leh RMSA bakah, SCERT hnuaia teacher education-te chu SSA scheme thar hian a huam dawn a, hlawm khatah dah a ni. Annual Work Plan & Budget a hrang ṭheuha siam ṭhin pawh hlâwm khatah siam a ni bawk.