Jail táng tlân chhuakte man leh

Serchhip-a Excise & Narcotics department-in ruihhlo kaihhnawiha an man mi pathumte chu May 7, Thawhṭanni khan Court aṭanga hawpui an nih laiin an tlân chhuak a, nimin khan Chhing­chhipah man leh an ni.

Tâng tlân chhuakte hi Vungliankap (48) s/o Kangdala, Hrianghmu; Malsawmtluanga (27) s/o Zadingliana, Zemabawk leh Nangsiankhai (18) s/o Gintuanthang, Myanmar an ni a, mi dang paruk nen Serchhip District Court-ah an thubuai ngaihtuah a nih hnuah an tànnaa hawpui an nih laiin an tlân chhuak a ni. Nimina man leh an nih hnuah Serchhip District Jail-ah dah an ni.

Thu dawn danin, Court aṭanga hawpui an nih lai hian ruah a sûr tam a, an chuanna motor (Gypsy) chu motor lian nena an inpelh dawn vang­a a tlân muan laiin motor aṭanga zuang chhuakin, Chhiah­tlang Chanmari Venga mi kàwm­kârah an pût bo nghal a ni. Anmahni vengtute hi mi pahnih an ni a, man leh tumin ûmzui mah se, an man hman lo.

Jail táng tlan chhuakte man tum hian Excise & Narcotics department-a thawkte chuan hma la zuiin, Serchhip leh a chhehvel khaw hrang hranga YMA leh V/C-te an hriattir nghal a; nimin chawhnu dar 1:30 vel khan Chhingchhip Venghluna YMA duty-te leh Excise & Narcotics department-te chuan an man leh ta a ni.