Lawngtlaiah inkhàrkhip dan tur rêl

Nimin khan Lawng­tlai bawrhsap Shashanka Ala hoin Lawngtlai District Task Force on COVID-19 member-te leh Lawngtlaia task force hruaitute'n DC Conference Hall-ah inkhàrkhip (total lockdown) kalpui dan tur an sawiho a; Fungsihchhuaha ramri venga duty zinga mi June 9, 2020-a thi H Lalvenmawii, Sangau sùnna hun an hmang nghal.

Meeting chuan, Lawng­tlai district-ah Covid-19 vei mi pali hmuh chhuah ni tawh mah se, qua­rantine facility-a ṭha taka khung hran lai an nih avangin mipui náwlpui tan hlauhthawn­awm lo turah an ngai a ni.

Lawngtlai khawpui leh Chawngte tih loh an district-a khaw dang zawngah chuan state sorkarin zawm tur inkaih­hruaina a siam chin bak chu khuahkhirhna an siam lo a; Lawngtlai leh Chawngteah ­erawh chuan June 11-17 chhung atan inkharkhip khauh taka kalpui phawt an rél.

Lawngtlai leh Chawngte-ah hian inkhàrkhip chhungin in sak leh hna thawh lak lawh lai chu task force hriatpuinain chhunzawm phal a ni a, ni tin mamawh leh damdawi dawrte chu hawn theih niin, dawr dang erawh chu task force ruahmanna angin a inchhâwka hawn a ni ang.