Tui chungchang sawihona buatsaih PHE Minister-in PHE Smart Water a tlangzarh

Public Health Engineering (PHE) department leh Eternity Partners chuan nimin khan Assembly Annexe conference hall-ah ‘Smart Water Solutions Conference’ an buatsaih a, thupui chu ‘Tui: Mi tin mawhphurhna’ tih a ni. Khuallian, PHE minister Zodintluanga'n mobile application thar, ‘PHE Smart Water’ a tlangzarh nghal.

PHE Minister chuan, khawvel ṭhang zelah technology hmang ṭangkai apiangin hma an sawn chak tih sawiin, "India rama hmun kilkhâwr tak taka sorkar scheme kalpuite hi technology hmangin khawpui zawk aṭangin an vil tawh a, technology ṭhan ruala ke kan pên a ngai," a ti a; PHE department-in mobile application ‘PHE Smart Water’ an siam thar chu mipui tana awlsamna thlentu a nih angin, mipuiin an hman ṭangkai ngei a beisei thu a sawi.

Zodintluanga chuan, PHE Smart Water hmang hian mipuiin tui haw hun te, an bill zat leh pek hunte an hriat theih dawn bakah, tui bill pawh an chhût thei dawn tih a sawi a, "Heng hi technology-in a ken tel a ni a, hei bakah hian mipui tana ṭangkai tur ṭhalai zawkte'n an zir thar zel a ngai a ni," a ti.

Tunah hian Aizawl mipui tan Greater Aizawl Water Supply Scheme Phase-I leh Phase-II hmangin tui pump a ni tih sawiin PHE Minister chuan, "Mipuiin hnianghnâr lehzuala tui an dawn theih nan SIPMIU hnuaiah project kalpui mek a ni. Kan ramah ruahtui kan dawng nasa a, mahse, fûr lai pawhin tui supply-ah harsatna kan tawk tho a, mipuiin tui dahkhawl kan zir a, kan humhalh thiam a ngai," a ti a; mipuite chu ruahtui khâwl uar zel turin a chah.

Inkhawmah hian Planning secretary Dr C Vanlalramsanga'n NEDP hnuaia department hrang hrang hmalakna leh hlawhtlinnate a sawi a; ‘Smart Water Solutions Mizoram’ lehkhabu a tlangzarh nghal.

‘PHE Smart Water’ apps hi mipuiin awlsam taka tui connection chungchang an hriat theihna atana ruahman a ni a, Integrity Solutions siam a ni. Aizawla tui connection 50,000 chuang hman tur a ni a, district khawpui dangah pawh hman theih thuai a ni dawn. Apps hi Google Playstore aṭanga download theih a ni a, 'PHE Smart Water' tia zawn tur a ni.

Smart Water Solutions Conference-ah hian PHE department official te, AMC, YMA, MJA, SIPMIU, MZU, Green Mizoram Network leh local council aṭangin mi

ṭhahnem tak tel a, mithiamte'n thupui hrang hrang an sawi. Vantlanga mi langsarte'n 'Tui leh mipuite' tih an sawiho a, Mizoram University lamin 'Tui chungchang hi' tih an sawiho. 'Tuihna humhalhah mipuite'n mawh an phur' tih hmangin Central YMA leh Mizoram Journalists' (MJA) aiawhte'n debate an nei a, MJA lam hi an chak a ni.