ZPM-in lei chim vanga Harsatna pawi an ti

Ṭangrual pawl, Zoram Peoples' Movement (ZPM) office bearer-te nimina ṭhukhawm chuan thuchhuah siamin, Feb­rua­ry 13, 2018-a Tuirini lei chim, tun thlenga siamṭhat a la nih loh vanga mipui tam takin harsatna an tâwk chu pawi an tih thu leh hrehawm an tih thu an tarlang.

ZPM thuchhuah chuan, Mizoram sorkar inthlah­dah vanga mipui harsatna a thleng chu pawi an ti tak zet tih sawiin, "Tunah hian nunaute an inpaw kai a, JCB hmangin an inthiar a ngai hial ta. Sesawng leh Khawruhlian V/C leh YMA-te'n tuilian vanga tangkhangte an buaipui a ngai ta hial hi ZPM chuan pawi kan ti hle a ni," a ti.

ZPM Steering Co­mmi­ttee chairman Lallian­sawta hoa ṭhukhawm chuan, "Sorkar hian mipui a ngai pawimawh lo hle a, heti em ema sorkar chak lo leh inthlahdah hi kan ning tawh tak zet a ni," an ti bawk.