Tuirini lei chim vangin harsatna a thleng
Nimin leh a hma lama ruahsûr vangin Tuirini lui a lian a, lirtheiin an dài kai theih loh avangin khualzin eng emaw zat chu May 8, Thawhlehni zan khan an tangkhang. Nimin chawhma lamah tulian a ziaawm deuh a, lirtheite an kal leh thei mah se, chawhnu lamah erawh lirthei tana kal kai theih lohin tui a lian leh a ni.
Thu dawn danin, Thawhlehni zana khualzin tangkhangte hi Sesawng leh Khawruhlian khaw mite'n chaw ei tur an siamsak a ni. Tuirini lui ke-a kaina turin thing dawh a hi a, chumi hmang chuan khualzinte chu ke-in an kal kai a ni. Tarlan tawh angin, Sesawng leh Khawruhlian inkara Tuirini lei chu February 13, 2018 khan a chim avangin a hêlna atan motor tana lui dai kaina siam a ni a, mahse, chu chu tun hnaiah tui lianin a tichhe nual tawh.
Tuirini kai hi nimin khan Chalfilh bialtu MLA Dr Ngurdingliana'n a tlawh a, mipuite harsatna tawh dan leh tuna lei dawh hna PWD-in an thawh mek a hmunah a enfiah.
Dr Ngurdingliana chuan, lei dawh hna thawktute chu an chak taka thawk tur leh fûrpui thlen hma ngeia lei dawh hna zawh hman tum turin a ngen a; fûr laia ni tin khawsakna mamawhah mipuiin harsatna an tawh loh nan sorkarin kudam hrang hrangah kumin October thla thleng tla tur buhfai a chhêk khawl tawh tih sawiin, eichawp zuar sumdawngte chu an thil zawrh man tisang lo turin a ngen a ni.
Ngurdingliana chuan, Tuirini lei dawh ṭhat nan hian Mizoram sorkar sum Rs. 2,10,00,000 dah a ni tih sawiin, fûr laia lui kânna atana lawnglêng mamawh a nih chuan MLA fund aṭangin a lei tur thu a sawi a; lei chim enfiah hna Aizawl DC-in a thawh mek chu zawh thuai a beiseiawm thu sawiin, zawh fel a nih hunah chuan lei chhe ṭhiah hna thawh theih a nih dawn thu a sawi bawk.
Tun dinhmunah Tuirini lui kânna atana hman lailâwk tur lei dawh nan lung lâk tur a tam tâwk loh avangin Khawruhlian, Hmunnghâk, Lailak leh Khanpui khuate chuan vawiin hian hnatlangin lung lak an tum a; luia hume pipe lian chi chherchhuana motor kal theihna tur lei sang zawk dawh hna thawh mek a ni.
Hetih lai hian, lei chim enfiah hna Aizawl DC-in a thawh mek hmáwr bâwk nan Indian Institute of Technology (IIT), Guwahati-a mithiamte chu thil awm dan a hmunah enfiahtir a tum nia thu dawn a ni.