Rangkachak kg. 8.635 man a ni

Aizawla Customs hna­thawkte chuan May 8, Thawhlehni chawhnu dar 2:30 vel khan Selinga Cus­toms checkgate-ah rang­kachak kg. 8 leh gram 635-a rit, cheng vbc. 2.70 hû an man a, a neitua puh mi pahnih an man nghal a, nimin khan Court-ah an hruai.

Customs (Aizawl Di­vision)-a Anti-Smuggling Unit superintendent LH Haokip sawi danin, Cus­toms hnathawkte hian an thu dawn bawhzuiin rangkachakte chu maxi­cab pakhata chuang mi pahnih - David Muang­pi (23), Sanmeuh Kawlpi, Myanmar leh Somkhan­kap (19), Tahan-B Group hnen aṭangin rangkachak an man a ni.

Rangkachakte chu tlang 52 niin, gram 8,635.87-a rit a ni a, tlang khat gram 166 vel zela rit a ni. Rangkachak man tâk hi a hralh chhâwnna rate-ah chuan Rs. 2,69,00,000 vel hûa chhût a ni.