MNF MLA-te'n MG Road lei dawh an enfiah
MNF party MLA pali - Vanlalzawma, Lalruatkima, Lalrinawma leh Dr K Beichhua te chuan nimin khan Upper Khatla MG Road-a lei tlahniam vanga Mizoram sorkarin lei (bailey bridge) a dawh mek a hmunah an enfiah.
MNF treasurer ni bawk Vanlalzawma chuan, lei dawh hi January 13, 2018-ah MNF MLA-te'n an tlawh tawh thu sawiin, "Lei dawh tur kan tlawh hnu lawka Mizoram sorkarin hna a ṭan zui hi a lawmawm rualin, hna bul ṭan hma khan rei tak chhung ngaihsak loa dah veng veng a ni a, tuna hna thawh kal lai pawh hi a chak lo lutuk a, February 16-a hna thawh ṭan tawh si, hna thawkte an haw tih vel chhuanlam nen vawiin thlenga hnathawh mumal la awm lo hi a rei lutuk tawh a ni," a ti.
Lalruatkima chuan, Congress sorkar chu lei dawh turin a inringzo tawh lo nia sawiin, "A hnuaia thawktu tur ni âwm tak sorkar department-te pawh a ring zo tawh lo nge, he lei dawh hna a privatise mai hi a mak hle," a ti. Dr K Beichhua chuan, Congress kaihhruai sorkarin lui chunga lei dawh an thiam lo a, khawmualah lei dawh an zir mek niin a sawi.
Lalrinawma pawhin, MG Road kawng chhia siam ṭhat kawngah sorkar a chak loh avangin mipuiin sum tam tak an hloh phah niin a sawi a, hna thawh zawh hun tura tih hi pawtsei loin, zo tura an tih hunah thawk zo ngei rawh se," a ti.
MNF tarlan danin, lei dawh hna hi Blue Hills Engineering-in an thawk a, Mizo zinga bridge engineer awmchhun nia hriat R Lalthlamuana'n a vil mek. A dawhna atana sorkarin sum a ruahman chu cheng nuai 221 a ni a, June 30, 2018 ral hmaa zo tura tih a ni.