KHAWTHLIR

Governor kâwm
Mizoram Judicial Service (MJS) trainee-te chuan May 8, Thawhlehni tlai khan Raj Bhavan-ah Governor Lt.Gen. Nirbhay Sharma an kâwm. Larsap chuan, judiciary chu democracy inghahna banpui a nih avangin MJS-te chu mite zahkai leh rin ngam an nih a pawimawh thu a sawi a, mipuite a remchan dan ang zela dan leh hrai hrilha zirtir zel turin a chah.

Dilna siam tur
Land Revenue & Settlement (LRS) department chuan thuchhuah siamin, periodic patta chu Revenue dan thar angin, a thih hma thla ruk chhung ngeia tihnun dilna siam tur a nih thu an tarlang a, "Dan tharah chuan 'Tihfel a nih loh chuan chu periodic patta chu a thi chawpchilh nghal ang’ tia ziak a ni," an ti. Hun tiam chhunga periodic patta tinung (renew) hman lote tan LRS department chuan September 30, 2018 thleng hun an hawn belh a, application rualin tihnun lehna fee te, chhiah bá leh tlai man fee (kum khata 20% chawiin)-te pein a tihnun leh theih a ni.

MLA-in tlawh
PMGSY hnuaia Mamit-Phaizau kawng sial hna thawh mek chu nimin khan bialtu MLA John Rotluangliana'n a tlawh. Minister chuan, kawng sial hna thawktute chu inremna awmsa angin October 2018-ah chuan zo ngei tura ṭan la turin a fuih a; hna viltu PWD-te pawh hna chak zawka a kal theih nana en zui leh bawhzui ngaiah thâ thlah loa ṭan la turin a chah bawk.

Lei laih khap
Aizawl DC chuan thupek chhuahin, Aizawl district chhungah District Disaster Management Authority phalna la hmasa loa mipui chenna hmun hnaivai leh kawngpui àna lei laih a khap. Saitual leh Sakawrdai Sub-Division huam chhungah chuan Sub-Divisional Disaster Management Authority-te aṭangin phalna lâk theih a ni ang.