Tuithiang-Saron Veng lei tawlh siamṭha dawn

Finance minister Lalsawta leh PWD minister Lal Thanzara chuan nimin khan Tuithiang leh Saron Veng inrìnaa kawng chhak lam lei tawlh an tlawh a, hna thawh dan tur an ruahman.

Minister pahnihte hian anmahni ṭawimawmtu Finance, PWD leh Disaster Management & Rehabilitation (DMR) official-te chu hna thawh ṭan a nih mai lohna chhan an zawt a; hna thawh nghal a nih theih nan ruahmanna an siam pui nghal. Hna thawhna atan hian New Economic Development Policy (NEDP) hnuaia State Disaster Mitigation Fund hman turin an ti a ni.

Lei tawlh thenfai leh a hmunhma sawhngheh hna chu vawiin aṭangin thawh ṭan tura tih a ni a; leivûng, bungraw chhia, in chhe tawh châk la inphûm leh hnawm­hnawk thenfai a nih chhungin kawng dan chah a ṭul tur thu PWD hotute'n an sawi. Chhun lamah lei laih hna thawh a ni ang a, zanah leivûng paih hna thawh a ni thung ang.

Leimin thenfai, lei tawlhna hmun siam rem leh thawm nghet hna atana detailed project report (DPR) 'Restoration of Landslide Area at Tuithiang and Saron Veng Border' chu PWD-in an siam a, DMR department hnenah an thehlut tawh. Hna thawh turah hian bungraw chhia thenfai leh senghawi a tel avangin State Disaster Mitigation Fund atana nodal department, DMR chuan DPR chu State Executive Committee (SEC) hmaah an pharh a la ngai dawn a ni.

'Restoration of Landslide Area at Tuithiang and Saron Veng Border' atan hian cheng nuai 108.19 rua­hman a a ni a; leivûng thenfai, RCC channel leh rectangular side drain with cover siam hnate a huam ang.