Entrepreneur leh bank hotute an inkâwm

NEDP-EDS hnuaia entrepreneur thlan chhuahte leh bank hotute tan nimin khan Secretariat conference hall-ah inkawmna hun, 'Banker - Entrepreneur' buatsaih a ni a, Planning minister Lalsawta'n a hmanpui.

Plannning Minister chuan, kum khat leh a chanve kal ta chhungin entrepreneur-te tan inelna chi hrang hrang buatsaih a ni tih sawiin, "Henga ti ṭhate chu sorkarin bul an ṭan nana theih­tawpa ṭanpui a inhuam reng. Banker-Entrepreneur meeting neih chhan ber pawh entrepreneur bul ṭan turte'n bank an dâwrnaah harsatna an tawh ṭhinte bank hotute nen hmaichhana sawiho theihna hun siam a ni," a ti.

Mizoram leilung leh a chengte enin NEDP chu hlawhtling ngei tura beisei a nih thu sawiin Lalsawta chuan, "Vawiin thlenga state chhunga bank hrang hrang awmte hnathawh a fakawm tak zet a, ṭan lakna tur erawh a la tam a ni," a ti a; investment tel loin sumdawnna hlawhtling leh lian tham tak tak a awm thei lo a, sumdawnna hlawhtling chuan hna (employment) a siam ṭhin thu a sawi.

Planning secretary Dr C Vanlalramsanga pawhin thu sawiin, NEDP chu khawvela sorkar programme duan chhuahah chuan huam zau leh kim ber pawl a nih a rin thu a sawi a, "Hlawhtling tak tak tur erawh chuan bank lam nena thawho ṭhat a pawimawh hle a ni," a ti a; meeting-a bank aiawha telte chu ‘Team Mizoram’ ah an tel vek a ni tih inhria a, theihtawp chhuah turin a sáwm.

Bank hotute chuan, sumdawnna lian tham deuh atana bank aṭanga loan la duhte chu bank zawng zawngin an inhman ṭâwm, Regional Self-Employment Training Institute’ (RETSI), Ṭhuampui, Aizawl-ah training neih phawt se an duh thu leh, loan rulhna tur nei ṭha lote tan chuan loan pek chhuah a harsat thu an sawi.