Durtlanga in a neih dan sawifiah turin PRISM-in minister R Lalzirliana an phût

PRISM party hotute chuan nimin khan an pisaah thuthar thehdarhtute an kâwm a; Home minister R Lalzirliana chu Durtlanga in a neih dan sawifiah tura an phût thu an sawi.

PRISM general secretary SL Ngursailova chuan, May 8, Thawhlehnia Durtlanga lehkha sema an hnatlannaah tláng kam aṭangin Durtlang Mel 5-ah R Lalzirliana'n in a sak thu an hria tih a sawi a, "Bawhzuiin kan en nghal a, kan rin aia ropuia a sa tih kan hmuh tâkah chuan, inthlan dawna a hausakna a puan chhuahnate zirchiang nghalin, hetiang in sa thei khawpa sum nei a nih leh nih lo uluk takin kan zir zui a ni," a ti.

Kum 2013-a Assembly inthlan dawnah R Lalzirliana'n a thil neih a puan chhuahnaah Rs. 51,55,000 leh pick-up leh Bolero a neih thu a tarlang tih sawiin SL Ngursailova chuan, "Armed Venga a in hlut zawng chu kum 2008 inthlanah Rs. 1,50,00,000 a ni a, kum 2013-ah chuan Rs. 5,50,00,000 a kai chho. Hetiang taka kum 10 chhunga a building nasa taka a ropui ta hi zawhna lian tak a ni," a ti a; R Lalzirliana hausakna chu kum 10 chhungin Rs. 5,98,95,118-a a pun thu a sawi.

PRISM hruaitute chuan, Durtlanga minister R Lalzirliana in chu PWD SOR, 2013 anga chhût chuan cheng nuai 150 vel man a ni a, chhâwng ngaa sang a ni thu sawiin, "Inthlan dawna cheng nuai 51 vel neia insawi siin, kum nga chhunga cheng nuai 150 man vel in a sa thei hi mipui hriatah a sawifiah kan phût. Kum 5 chhunga a hlawh lak belh khawm hi Rs. 52,80,000 vel tur a ni a, a hlawh pumpui pawh in sak nan hmang se, cheng nuai 150 seng tur chuan a hlawh hian cheng 97 velin a la daih dawn lo a ni," an ti.