Covid-19 vei hmuh chhuah chungchang Lunglei DC-in thuthar thehdarhtute a hrilh

Lunglei bawrhsap V Lalsangliana chuan nimin khan DC confe­rence hall-ah thuthar thehdarhtute a kâwm a, an district-a Covid-19 vei hmuh chhuah chungchang a sawifiah.

A hmaa lo hmuhchhuah tawhte nen Lunglei district-ah hian Covid-19 vei mi 45 an awm mek thu sawiin V Lalsangliana chuan, "Kan district-in hetiang boruak kan tawng hi pawi ka ti hle. Chutih rualin, Covid-19 vei nu leh pa, chhungte leh mipuite chîâi lo turin ka ngen a ni. Positive kan neihte hi kum la naupang, hrisel ṭha lai an ni a, an dinhmun hlauhthawnawm a ni lo. Medical team-in chhùn zan zawmin an vil reng a, theihtawp kan chhuah tlang ang a, an dam thuai kan beisei," a ti.

Lunglei DC sawi dan­in, Covid-19 positive case thar 43 an awm tih hriat a nih veleh medical team, police leh magistrate-te'n a ṭul angin hma la an nghal a, Lunglei College chu hripui veite enkawlna - Covid Care Centre (CCC) atan Mi­zoram Epidemic Disease (Covid-19) Regulations, 2020 hmanga puan nghal a ni.

Covid-19 positive thar mi 43-te chu Lung­lei College CCC-ah dah nghal a ni a, Lunglei College-a awm sa hripui kai ve lote chu lâk chhuah niin, sorkar quarantine facility dang­ah sawn an ni. Lunglei College CCC hi mi 80 awm theihna tura ruahman a ni.

Thuthar thehdarhtute zawhna chhangin Lunglei chief medical officer Dr Thani Pachuau chuan, Lunglei district-ah mi 738-te swab sample lak a nih tawh thu sawiin, "Tun dinhmunah result 434 hmuh tawh a ni a, result nghah mek 304 a la awm. Puducherry, Tamil Nadu leh Goa aṭanga lo haw quaran­tine period zo tawh, swab sample la lak loh mi 67-te chu RTPCR-a test turin koh khawm a, an swab sample lak a ni ang," a ti.