MPCC-in campaign bulṭanna an hmang ; Nasa takin kan insiamṭha mek - Lalsawta

Mizoram Pradesh Congress Committee (MPCC) chuan nimin khan Lungdai leh Kawnpuiah campaign bulṭanna hun an hmang a, MPCC vice president Lalsawta chuan an party nasa taka an insiamṭhat mek thu a sawi.

MPCC Vice President chuan an party chuan thil ṭha tam tak an tihrualin, tihfuh loh pawh an neih thu sawiin, "Kan tlin lohna leh kan tihsual zawng zawngah Mizoram mipui hnenah ngaihdam ka dil a, kan dik lohna hi kan pawm thlap a ni. Tunah hian nasa takin kan insiamṭha mek a, ram leh mipui ti hmasawn turin ngaihtuahna thar nen kan kal mek a ni. Kan danglam dawn. Mipuite tan kan thawk dawn, min ring rawh u. In tana ṭha lo engmah a thleng lo ang," a ti.

Tuirial bialtu Andrew H Thangliana a thi chu pawi an tih thu sawiin Lalsawta chuan, "A chhungte Pathianin awmpui rawh se, tih hi kan duhsakna a ni. Tuirial bial mipuite hian zalen takin, in duhna ngeiah vote thlak ang che u. Ruling party in vote loh chuan tia vauna ang lek leka ngaih theih kan Chief Minister-in a sawi kha a pawi ka ti a, ramhlui zia dik tak a ni," a ti a, Zoramthanga chuan Mizoram chief minister ni loin, MNF chief minister chauh a ni tih chiang takin a lantir thu a sawi.

Mizoram sorkar pawisa dinhmun a ṭha tih a hriatchian thu sawiin MPCC Vice President chuan, "Hripui vangin hun harsa tak tawk mah ila mipuite enkawlna tur pawisa a tam tawk a, mahse hman dik a ni lo mai chauh a ni. Mipuite hrilengin a tih mangan laia sum neih belh tuma ram hruaitute ber an phe an phe hi a pawi a ni," a ti.

MPCC Vice President chuan an party chuan ṭhat loh theih lohna bawm an siam dawn thu sawiin, "A theih tih pawh kan hria a ni," a ti a, Congress tharah chuan mipui duhthusam system dik mipuiin an hmuin, an hlima an lawm tawh tur thu a sawi.

Congress party candidate Chalrosanga chuan thianghlim takin politics a khelh theih thu sawiin, "Politics hi thianghlimna leh rinawmna hmangin a khelh theih. Tun hunah hian Tuirial bial mi ngei, Tuirial bial tlangval ka lo ding a, khawngaih taka min lo vote turin ka ngen che u a ni. Pathian leh Tuirial bial mipuite zara thlan tlin ka nih chuan kuthnathawktu, Tuirial bial chhung ngeia huan lo ram nei ve ngei ka nih angin agriculture lamah nasa taka hmalak ka tum," a ti.

Chalrosanga chuan a bial mipuite tana thlai chi sem ṭhin bialtu MLA thi ta Andrew H Thangliana hmalaknate ropui a tih thu sawiin, "Ka tling a nih phawt chuan a hmalaknate ka chhunzawm ngei ang. Agriculture link road ṭha zawk kan siam ngei ang. Contract leh thil dang, sorkar hnaa inthunte pawh ka tiam ve thei lo che u," a ti a, thlan tlin a nih chuan bial tan a rilru, ngaihtuahna, a neih zawng zawng leh a theihna zawng zawng a hman tur thu a sawi.

MPCC campaign bulṭanna puala inkhawmah hian MPCC general secretary RL Vala leh AMC councillor Rosiamngheta te pawhin thu an sawi.