Mizoram hmun hrang hrangah sorkar laipui pek Oxygen plant bun thar hawn a ni

Prime Minister's Citizen Assistance and Relief in Emergency Situations Fund (PM CARES Fund) kaltlangin nimin khan India ram state hrang hrangah pressure swing adsorption (PSA) oxygen plant din/bun thar te hawn a ni a, Mizoramah pawh hmun hrang hrangah hawn a ni.

AIIMS Rishikesh, Uttarakhand aṭangin prime minister Narendra Modi chuan internet kaltlangin hmun thlan bik 35-ah oxygen plant a hawng. Heng thlan bik 35 zingah hian Serchhip District Hospital pawh a tel.

Chief minister Zoram­thanga chuan nimin khan PM CARES Fund aṭanga PSA oxygen plant bun thar Mizoram State Cancer Institute (MSCI), Zemabawkah a hawng.

Zoramthanga chuan oxygen plant ṭha tak MSCI leh Mizoram hmun hrang hranga hawn a ni chu lawmawm a tih thu sawiin, "Tunlai Covid-19 hrileng mai bakah natna hrang hrang avanga damlote hnena an mamawh khawp oxygen pek tur awlsam taka siamna tur hospital-ah kan neita hi a hlu takzet," a ti.

Serchhip District Hospital-a Prime Minister-in oxygen plant a hawnna chu Health minister Dr R Lalthangliana hoa lo zawm ve a ni a, hawnna inkhawm zawhah hian Health Minister hian Ser­chhip Bazar building tih­zauhna hnathawh (extension) mek a enfiah nghal.

Health Minister chuan tun hnaiah hripui leng avangin hriselna lama hmanrua leh thawktu mamawhna a pung nasa tih sawiin, "Hmanrua leh khawl pawimawhte hi lam hla tak aṭanga phurh thlen ngaite an ni ṭhin a, a bunna turah mamawh dang tam tak a lo ṭul ṭhin nen chawpchilh leh rang taka thil kal pui a har chang a awm a, hei hi mipuiten min hriatpui a ṭul hle," a ti.

Sorkar hmalakna anih vangin thawklehkhatah thil a tih fel rum rum theih vek bik loh nia sawi­in Dr R Lalthangliana chuan,"Sorkarin hridona kawnga hma a laknate hi hripui len lai leh a reh hnu pawha kan ramin khuarei thlenga a ṭangkaipui tur a tam hle," a ti a, district tina RT-PCR dah tur te, district tina oxygen khawl hawn thar leh hmalakna dangte chu hripui reh hnu pawha ṭangkai chhunzawm tur an nih thu a sawi.

Saitual District Hospital-a oxygen plant thar chu bialtu MLA R Lalzirliana, minister of state in a hawng a; Keifanga mega watt 10 pe chhuak thei solar plant power supply tur chu tun favangah rokhawlhna a awm loh chuan bun theih a hmalak mek a nih thu leh North Lungpher ramah megawatt 30 pe chhuak thei solar plant bun tum a ni thu a sawi.

Minister of state Lalruatkima chuan DCHC, Kulikawn Hospital, Aizawl-ah oxygen plant bun thar chu a hawng a, Aizawl South-II bialtu MLA Lalchhuanthanga leh Health department hotute an tel. Lalruatkima chuan Covid-19 donaa Health department leh task force-te inpekna chu lawmawm a tih thu leh Mizoramin health facilities ṭha a neih theihna kawnga Health Minister leh department hmalakna chhuanawm a tih thu a sawi bawk.

Champhai North bialtu MLA Dr ZR Thiamsanga chuan Champhai District Hospital oxygen plant thar a hawng a; RT-PCR bunna tur hmunhma drawing peihfel a nih tawh thu leh a hmunhmate enfiah turin Champhai district bialtu MLA pathumte'n mithiamte hruaiin karleh lamah Champhai an tlawh tur thu a sawi.

Aizawl mayor Lalrinenga Sailo chuan state referral hospital (SRH)-ZMC ah 1,000 LPM oxygen plant a hawng a, Mizoram tana thil chhinchhiah tlak a nih thu a sawi. ZMC-a oxygen plant hawn thar hian minute khatah oxygen litre 1,000 a pe chhuak thei a, a thianghlim zawng hi 93 – 95% a ni.

Lawngtlaiah chuan LADC chief executive member (CEM) V Zirsanga'n district hospital-ah oxygen plan hi a hawng a, ṭha leh tluang taka hman a nih zel theih nan thawktute leh district mipuite chu theih tawp chhuaha ṭang tlang zel turin a chah. Hospital chhung hmun 43-ah oxygen herh chhuahna siam a ni a, DCHC-a enkawl mekte tan hmun pariatah outlet dah tel a ni.

Khawzawl District Hospital-ah chuan bawrhsap CC Lalchhuangkima'n a hawng a, nakin zel thlenga Covid-19 ni lo natna dang vanga oxygen mamawhte tan hman ṭangkai zui theih tur a nih thu a sawi. Siaha-ah chuan DC Kesavan R chuan district hospital-ah a hawng a, "Oxygen plant kan neih tawh avangin Aizawl lama oxygen refill pawh a ngai tawh dawn lo a, a lawmawm hle a ni," a ti.

Kolasib District Hospital PSA oxygen plant thar chu district bawrhsap Dr H Lalthlangliana'n a hawng a, enhranna awm lo a intluktlang taka damlo te enkawl zel turin thawktute a chah. Mamit DC Dr Lalrozama chuan Mamit District Hospital oxygen plant thar chu a hawng a, a enkawl zui zelna kawngah leh a mamawhtute'n ṭangkai zawka an hman theihna tura vil zui kawngah theihtawp chhuah zel turin thuneitute a chah.
Hnahthial district additional DC Saizikpuii chuan district hospital oxygen plant thar a hawng. Oxygen plant hian minute khatah oxygen litre 250 a siam chhuak thei dawn a ni.