Guwahati-a meeting-ah L Thangmawia a tel

11th Meeting of High Powered Review Board of Brahmaputra Board chu nimin khan Guwahati-ah Jal Shakti minister Gajendra Singh Shekhawat kaihhruaiin neih a ni a, Mizoram aṭangin Human Resources Development Board vice chairman L Thangmawia, MLA pawh a tel.

Sorkar thuchhuah tarlan danin L Thangmawia chuan Mizoram tui hmuhna hnar pawimawh chu ruahtui , lei hnuai tui leh luite a nih thu a sawi a, "Tun dinhmunah rain water harvesting lamah ṭan lak a la ngai a, sorkar laipuiin Mizoram sorkar ruahmannate a tihhlawhtlin sak a ṭul," a ti a, Mizoram sorkarin rain water harvesting work plan 2019-22 leh 2022-24 atana cheng nuai 21,793.50 a siam chu ngai pawimawh turin a ngen.

L Thangmawia chuan Mizoram sorkarin Central YMA nen thawkhoin inzirtirna leh a theih anga hmalakna a kal pui mek thu te, Tlawng lui chu Mizoram nunna hnar pakhat a nih thute leh PHE department-in Rejuvenation, Protection and Management of Tlawng River tih concept an siam chu Brahmaputra Board aṭangin emaw Jal Shakti Ministry aṭangin emaw tihhlawhtlin sak ngei a ṭul thu a sawi bawk.

L Thangmawia hi Guwahati DRC Dr Malsawmtluanga Fanchun-in a ṭawiawm a ni.