Ṭamdil tihchangtlun tum a ni - EFCC Minister

India ramin zalenna a neih kum 75-na lawmna kal zelah, nimin khan Ṭamdilah Azadi Ka Amrit Mahotsav Iconic Week 2021 hawn a ni a, week hawngtu Environment, Forest & Climate Changte (EFCC) minister TJ Lalnuntluanga chuan Ṭamdil tih hmasawn tum a nih thu a sawi.

EFCC Minister chuan Ṭamdil bul vel ramngaw ṭhat avangte leh khualzin hip theitu ṭha tak a nih avangin EFCC dept.-in Ṭamdil venhimna leh tihhmasawn nan hma a la reng tih sawiin, "Ṭha lehzuala Ṭamdil enkawl a nih theih nan leh mipuiin an hlawk pui zawk theihna atan EFCC dept.-in a huhoa enkawl dan tur, Integrate Management Plan a buatsaih chu State Wetland Authority-in a pawm hnuah tunah hian Ministry of EFCC hnuaia peng pakhat National Plan for Conservation of Aquatic Ecosystems chuan a pawm fel tawh," a ti.

Ṭamdil chhehvel khaw mipui tan eizawnna ngelnghet zawk siamsak turin kumhlun thlai chingte ṭanpuina chhungkaw 206 hnenah cheng nuai 103.00 man hu pek tum a nih thu sawiin TJ Lalnuntluanga chuan, "Kum li dang la pek leh zel tur a ni," a ti. Ṭamdil tichhe thei venna atan research neih mek a nih thu te, interpretation hall, watch tower leh rope way siam a nih thute leh tlawhtute hman atan lawng bakah a sirah swimming pool siam tum a nih thute a sawi.

Azadi Ka Amrit Mahotsav Iconic Week hawnna hun hi PCCF Jitendra Kumar-in kaihhruaiin, Saitual DC VL Hruaizela Khiangte pawhin thu a sawi.