Two wheeler taxi stand siam belh ngen

ZPM Ṭhalai chuan, nimin khan Aizawl Mayor hnenah Aizawl khawpui chhungah two wheeler taxi stand siam belh tura ngenna an thehlut. ZPM Ṭhalai chuan stand a tlem avangin two wheeler taxi khalhtute an mangang niin an tarlang.

ZPM Ṭhalai tarlan danin, December 15, 2018 hma lam zawngah two wheeler taxi permit 691 pek chhuah a ni. MNF-in an sorkar hnuah November 24, 2020 aṭanga March 4, 2021 inkâr, thla li chhungin permit 1,889 an pe chhuak hman a, thla li chhung lekin a hma-a awm sa let thum deuhthaw an pe chhuak hman tihna a ni.

Politics-a induhsakna leh contract hna inpêk aiawh niawm fahrana, a mamawhtute hnenah pawh ni lo, hralh chhawn leh mai mai tura party mite hnenah sorkarin permit a thei sem nia tarlangin ZPM Ṭhalai chuan, "He thil hian two wheeler taxi hmanga ei zawng tak tak miharsa zawkte eizawnna a tichhia a, Transport Minister hian two wheeler taxi permit hi politics khelhna atan a hmang ta mai em ni?," an ti.

ZPM Ṭhalai chuan two wheeler taxi permit pekchhuah a nih laiin, a stand siam belh chungchangah MNF kaihhruai AMC sorkar chu a hnufum hle tih tarlangin, "Tunah hian stand 124 chauh awmin, dinna tur inchan loin two wheeler taxi driver-te an awm mêk a,stand siam belh a, a stand awm sa tizau turin AMC mayor hnenah ngenna kan thehlut a ni," an ti.