KHAWTHLIR

MCC complaint-na
Kolasib district election officer Dr H Lalthlangliana chuan nimin khan thuchhuah siamin, Tuirial bial by-election lo awm tura model code of conduct bawhchhiatna awmte online a complaint thehluhna tur 'cVigil' mobile application chu playstore-ah download theih a nih thu a tarlang.

Thilpek hlan
India Formosa Foundation chuan nimin khan Lairam Christian Medical Center & Hospital (LCMC), Lawngtlai tan, Lai House Aizawlah ventilator 1, oxygen concentrator 1, apron 100, mask N95 200, faceshield 400 leh gloves 250 an hlan.

Speaker-in Covid a kai
Assembly speaker Lalrinliana Sailo, a nupui leh a fapa chuan nimin khan Covid-19 a vei tih hriat chhuah a ni. Sorkar thuchhuah tarlan danin, Lalrinliana Sailo leh a fapain symptoms an nei lo a, in lamah enkawl an ni.

Alliance Air
Mizoramah October 18, 2021 aṭangin Alliance Air thlawhtheihna a service ṭan dawn. Alliance Air hi Kolkata-Guwahati-Aizawl-Shillong inkarah Thawhṭanni, Thawhlehni, Ningani leh Inrinniahte a service ṭhin ang.

James-a man
Sailutar khuaa January, 2021-a rawngbawlna a neih hnua cham chhunzawm, James Lalramliana chu hmeichhe naupang pawngsuala puh a nih avangin man a ni. James-a lakah hian Darlawn Police Station-ah FIR thehluh niin, hemi bawhzui hian police-te chuan October 6 khan an man.

Thisen pe
Hrangbana College NSS chuan nimin khan a záwna ni thumna atan an college hall-ah thisen pek an huaihawt leh a, Aizawl Civil Hospital tan thisen unit 75 an pe. Hrangbana College NSS hian ni thum, October 5-7 chhungin thisen unit 225 an pe a, petute mipa 196 leh hmeichhia 29 an ni.

Nomination thehlut
October 30, 2021-a Tuirial bial MLA by-election neih tura ZPM candidate Laltlanmawia chuan nimin khan Returning Officer hnenah nomination a thehlut.