Kawng siam hna thawk tha lo kan dim dawn lo - PWD Minister

PWD minister Lal Thanzara chuan, kawng siam hna thawk ṭha lote chu an dim dawn lo tih a sawi a, "Zawmthaw taka hna thawk an awm chuan an chanvo tur ang sorkarin a pe zel ang," a ti.

Nimin zinga PWD-in kawng an siamna tur hmanraw hrang hrang New Secretariat Complex aṭanga a vai liamnaah PWD Minister chuan, "Khuain min bumro avangin duh angin hma kan la chak thei lo a, mipuite hriatthiamna kan ngen. Khua a ṭhat chuan PWD hi kawngpui ṭha duh ber kan ni," a ti a; khua a ṭhat chuan rim taka kawng siam hna thawh zel a nih tur thu a sawi.

Lal Thanzara chuan kawng siam kawngah PWD puitu tlawm­ngai pawlte chunga a lawm thu a sawi rualin, awmze nei (constructive) záwnga inpuih ni se a duh thu a sawi a, "Sorkar tihmualpho tum ringawt ni loin, a ṭha lo an hriat chuan PWD hotute hrilh se, a ṭul chuan kei pawh min hrilh mai tur. Sorkar aia thuneitu, sorkar chunga léng emaw inti an tam hi a vanduaithlak," a ti.

Union minister of state for Road Transports & Highways Mansukh L Mandaviya-a'n Mi­zo­ram sorkarin kawng siamna atana sorkar laipui sum pek a hmang dik lo nia a sawi chungchangah PWD Minister chuan, "Indian Roads Congress (IRC) hawnnaah kan ṭhu dun a, kawng tihhmasawnpui min tum thu min hrilh a ni," a ti a; New Delhi-a a zin hunah thil ṭul ang buaipui dun a tiam niin a sawi.

Lal Thanzara chuan L Mandaviya chu IRC hawn tûkah tute'n nge dik lo taka thil lo hrilh a hriat loh thu sawiin, "Sorkar laipuiin sum min pek national highway sum hi state khawih a ni lo a, hman dik loh pawh tum ila thil harsa tak a ni. Politics thilah Mansukh L Mandaviya hian sum hmang dik loh chungchang hi a sawiah ka ngai," a ti.

Turini lei chim vanga hmar tlangdungte'n harsatna an tâwk chu pawi a tih thu sawiin PWD Minister, "Lei dawh chhunga lirthei tlânna tur kan siam chu tui lian avangin zawh ṭhat theih a ni loa, a pawi kan ti hle a ni," a ti a; PWD chuan theihtawp a chhuah zel tur thu a sawi.

Mizoram sorkarin NEDP aṭangin PWD chu kawng siamna tur hmanraw leina atan cheng vbc. 13.68 a pe a, nimina PWD Minister-in a vai liam tâkte hi 3DX super backhoe loader JCB 20, TATA LPK tipper 20 leh Bolero pick-up (4 wheel) 10 a ni. Primax P-5 concrete mixer pawh 20 lei a ni tawh a, PWD Complex, Zuangtuiah dah a ni.

Heng bakah hian, VMT 330 mini tandem vibratory vompactor 20, Bolero pick-up 10 leh mini hot mix machine 20 lei a ni tawh a, Mizoram a la rawn thleng lo thung.