Lai hmeichhiate'n khawmpui hmang

Lai Women Asso­ciation (LWA) chuan, ni­min khan Lawngtlaia Chandmary Inpuiah inkhawmpui an hmang a, minister Vanlalawmpuii Chawngthu-in a hmanpui.

Vanlalawmpuii Chawng­­­thu chuan, nu­ho inzawm khawm pawl a nêp ngai lo tih sawi­in, "An hmalakna pawh ram leh hnam leh khaw­tlangin a chhawr hle ṭhin. Hmeichhiate chu chhung­kua leh khawtlang siam ṭha tura mawhphurhna pawimawh ber chelhtu an ni. Hmeichhe din­hmun chawikân nan hmeichhiate ṭan ruala indâwm tawn a ngai," a ti.

Duhsak leh dâwmkan tlak ni turin sorkarin hmeichhiate hamṭhatna ruahmanna hrang hrang a neihte chu a ṭha zawnga hman thiam a ṭul thu sawi­in Vanlalawmpuii chuan, mahni hma zawn ṭheuhah hmeichhe dinhmun beng hniamtu ni lo a, chawi sangtu nih zawk tum ṭheuh turin LWA member-te chu a chah a ni.

LWA inkhawmpui hi an president H Van­lalhruaii'n a kaihruai a, Lai zinga chawimawi tlak hmeichhe pali hnenah chawimawina thuziak an hlan. Inkhawmpui hi vawiinah a ṭiak ang. LWA hi April 24, 1996-ah din a ni a, tun din­hmunah general head­quarters hnuaiah sub-head­quarters pathum leh branch 65 a awm a, member 6,000 vel an ni.