HSLC 2018 Top 10-te chawimawi

MZP general headquarters chuan, High School Leaving Certificate (HSLC) Examination 2018-a top 10-a Mizo tlingte chawi­mawina hun nimin khan Lal Thanhawla Auditorium-ah an hmang a, School Education minister H Rohluna'n a hmanpui.

School Education Minister chuan, HSLC exam pass percentage a sang zel nia lang chu lawmawm a tih thu sawiin, "Subject hrang hranga ti ṭha berte mark hmuh zat en hian, kan zirlaite hian thiamna tak tak an nei ngei tawh niin a lang. HSLC 2018 result aṭang hian sorkar enkawl sikulte leh private school-te dinhmun a inrual chho ṭan niin a lang," a ti.

H Rohluna chuan, zirlai kal khawmte chu zirlai tibuai thei social media hrang hrangte hman dan tâwk hre turin a chah a, "Zirlaibu piah lama lehkhabu ṭha chhiar tam a pawimawh," tiin, zirlai hlawhtlingte ram leh hnam tihmingṭhatu leh mi ṭangkai ni zel turin duhsakna a hlan a ni.

MZP president L Ramdinliana Renthlei chuan MZP-in chawi­mawina hun an buatsaih chhan chu - Mizo zirlaite zingah inelna thianghlim awm se an duh vang leh zirlaite'n Mizo hnam kal zel turah tih tur leh mawhphurhna an nei ve a ni tih hria se an duh vang a nih thu a sawi a; HSLC pass chu zirlai la kal zel turte tan bul ṭanna chauh a ni tih sawiin, HSLC pass tharte chu duhthlanna dik leh fel siam a, Mizoram chhung mai ni lo, Mizoram páwna hnam dangte el phak tum tur leh Mizoram leh hnam tihmingthatu nih turin duhsakna a hlan.

MZP-in an chawimawite hi HSLC 2018 top 10-a lang Mizo zirlai 14 an ni a; chawimawina thuchei, tawlhloh puan, lehkhabu leh ipte an hlan a ni.