KHAWTHLIR
Vawk endik
AH&Vety department-a Rapid Response Team chuan, nimin khan Aibawk, Muallungthu, Hualngohmun leh Melriat khuaahte khawthlang hruaitute leh vawk vulhtute nen vawk hrileng chungchangah inkawm khawmna hun an buatsaih a, vawkte an endik nghal.
Tlan theih loh
PWD chuan vawiin aṭangin July 11, 2018 thleng chhun leh zanah Saron Veng leh Tuithiang inrinaa leimin thenfai hna an thawk dawn a, hei vang hian lei minna bul kawngpui (Chhinga Veng - Bethlehem Veng)-ah hna thawh chhungin lirthei tlan tlang phal a ni dawn lo. Hna thawh tibuai thei tura kawngpui síra lirthei leh bungrua khap a ni bawk.
Thisen pe
Mizoram UPC hnuaia Pathian thu zirna, Apostolic Theological Institute chuan nimin khan blood donation camp an huaihawt a, Synod Hospital tan mipa 32 leh hmeichhia pakhatte'n thisen unit 33 an pe.
Zu siamna tichhia
Excise & Narcotics enforcement duty-te chuan, nimin khan Phunchawng leh a chhehvel thenfai hna an thawk leh a, hmun 14-ah zu siamna an tichhia. Rakzu litre 70, zu bilh lai ṭín 526 leh zu sakna bêl 34 an man bawk.
Lehkhabu thar
C Lalthangpuii lehkhabu buatsaih, 'C Lalruata Biahzai' tih chu nimin khan Synod Conference Centre-ah minister R Lalzirliana'n a tlangzarh. Lehkhabuah hian thuziak 47 a awm a; rambuai chungchang, zirna leh a siamṭhat dan tur, politics, ram leh khawtlang siamṭhatna lam hawi, mimal leh pawl chanchin ziahna, sermon, lemchan leh a dangte a awm a ni.
Legal volunteer
Mamit District Legal Service Authority chuan, nimin khan Mamita DLSA Recreation Hall-ah Yearly Meet & Training of Para Legal Volunteers and Conciliators an buatsaih. Training hi MDLSA secretary Gracy L Bawitlung, chief judicial magistrate-in a kaihruai a, Gauhati High Court Aizawl Bench joint registrar Laldinpuia Tlau-in thil pawimawhte a zirtir a ni.