State thuneihna district leh village-ah an mamawh anga hlan a ni ang - Zorama

MNF president Zoramthanga chuan, MNF a sorkar hunah chuan state thuneihna chu district leh village thuneitute hnenah an mamawh ang zela hlan a nih tur thu a sawi.

Zoramthanga hian nimina MNF Champhai North-I leh South Block political training, PD Sena Memorial Hall, Champhai Kanan Venga neihah thu sawiin, MNF a sorkar chuan thuneihna sem zâi (decentralisation of power) an ngai pawimawh dawn tih sawiin, "Hei hi SEDP-ah pawh telh thlap a ni. Kan sorkar veleh system tharin kan kal ang a, district-a mi chu district-ah a lut ang a, village-a lut tur chu village-ah a lut ang," a ti.

Decentralisation of power kalpui turin chief minister, minister leh MLA-te an thilphal a ngai tih sawiin Zorama chuan, "Keini chuan secretary leh director-te kuta admistration hrang hrang tàwp mai ṭhin hi mipuiah a ṭul ang chin chu tâwptir kan tum," a ti a; thuneihna sem zai tura an inbuatsaih thu a sawi.

Zoramthanga chuan, Mizorama Congress party bu pui, CADC-ah party malin MNF-in seat an la tam ber tih sawiin, "Sorkar siam tura kan inbuatsaih laiin Congress-in sorkar an siam loh hlau lutuk leh mangangin, an khingpui hlun leh an huat ber BJP hmaah an puanthuah télin an bathlarah an intulût a, 'Fapaa vuah tlak pawh ka ni lo, in hnena inhlawhfa turin min lo pawm ru' an ti a ni ber," a ti.

MNF President chuan, Congress pary chu a ni tèlin an tlachhe telh telh nia sawiin, "Chhungrilah an keh chhe nasa em em a, Delhi leh state dangah an tla chhe vek tawh. CADC aṭangin Zoram mipuiin Congress sorkar kan bye bye mek zel a ni," a ti a; MNF sorkar laia an kutchhuak hmasawnna zawng zawngte chu Congress sorkarah a ṭhing ṭhuap a, hma thar lakna an nei lo niin a sawi bawk.