MIMER bul ṭan dan tur sawiho

Medical Council of India (MCI)-in Mizoram Institute of Medical Education & Research (MIMER) din a phalsak tâk avangin, nimin khan college bul ṭan dan tur Health minister Lal Thanzara hoin Chief Minister's Office (CMO) conference hall-ah rêl a ni.

Health Minister chuan, Mizoram nghahhlelh em em medical college din MCI-in a phalsak tâk avanga lawmmawm a tih thu sawiin, "Mizoramin méllung pawimawh tak a phun a ni. Medical college hi a bulthûm aṭangin a ṭha thei ang bera din leh enkawl zul a ṭul. A hlawhtlinna atana thâ leh zung, ngaihtuahna sêngtu zawng zawng chungah lawmthu ka sawi a ni," a ti.

Meeting-a tarlan dan­in, MIMER-a MBBS seat 100 awm turah seat 15 chu sorkar laipui thu ang­in central pool quota-ah dah a ni dawn a, a bak seat 85 chu Mizoram sorkar kutah dah a ni ang.

Meeting-ah hian seat sem dan tur, zirlai lak dan tur, prospectus siam dan tur leh a kaihhnawih ngaihtuahtu sub-committee chu Health & Family Welfare joint secretary Lalchhanhima kaih­hruaina hnuaiah a din nghal a ni.

Medical college-a fee bithliahtu tur Committee for Fee Fixation pawh din nghal a ni a, MCI-in a phût angin Justice retired ngei dah a ngaih avang­in chairman atan High Court chief justice (Rtd) T. Vaiphei chu rawt a ni.