CM-in Mat Minor Irrigation Project hawng

Mat lui chhehvela leilet leh huan châwmtu tur, Mat Minor Irrigation Project chu May 9, Nilaini khan Mat lui kamah chief minister Lal Thanhawla'n a hawng.

Chief Minister chuan, hlâwk zawka buh leh bâl thar turin agriculture kalpui dan a ngheh a ngai tih sawiin, "Chumi atan chuan irrigation a pawimawh a ni. WRC (leilet) te, terrace siamte a hautakin thâ leh sum sên a ngai nasa ṭhin a, a châwmtu tur tui supply ṭha a pawimawh. Chu­tianga ke pên thei tura Mat Irritation Project hman theih a nih takah hian, leilet neitu eng emaw zat a chhâwk zângkhai phah ngei ka beisei," a ti.

Technology thiamna tel lo chuan hmasawn a har tih sawiin Lal Thanhawla chuan, "Mat Irrigation Project pawh a hawnnaah tàwp mai loin, a enkawl zui zelna a pawimawh," a ti a; Mat lui leh a chhehvela leilet neitute chu hamṭhatna awm thei ang ang an hmuh theih nan pawl anga an tih tur ṭulte bawhzui turin a chah.

Minor & Irrigation minister KS Thanga pawhin thu sawiin, kut hnathawktute ṭangkaipui turin tui luangin leiṭha a len ral mai loh nan te, tui lâkna kawng thawm ṭhat leh a dang mamawh hrang hrang awmte chu NEDP kal­tlanga sukiang turin sum a awm thu a sawi.

Mat Irrigation Project hi cheng nuai 554-a siam a ni a, ram hectare 176-a zau châwmin, chhungkaw 44-in an chhawr thei dawn a ni.