Nikum aiin kuminah thubuai ziah luh a tlem

Deputy Inspector General (DIG) Northern Range chhunga SP, Traffic SP leh commandant-te chuan nimin khan DGP Balaji Srivastava hoin Police headquarters-a Arya Mess-ah Crime Review and Law & Order Review Meeting an nei a; January-April chhung­in nikum aiin kuminah thubuai ziah luh a tlem zawk thu tarlan a ni.

Meeting chuan, Mizoramah lirthei a pung nasa a, a bikin Aizawl­ah a pun nasat lehzual thu tarlangin, hei hian traffic jam nasa taka a siam bakah, khawi emaw laiah fimkhur loh vanga chàtsualna a thlen fo thu a tarlang a, "Sorkarin kawngpui dunga motor dah a phal loh hnu pawhin kan zâwm ṭha lo a, accident a thlen phah ṭhin a ni," an ti. Kuminah lirthei chetsualna vangin mi pakua an thih tawh thu an tarlang.

Police-te'n rûkrute man chhuakin, court leh jail-ah thawn zel ṭhin mah se, pawikhawihtu/rurkrute an rêm mawh thu tarlangin meeting chuan, "Rûkrûk titlem tur hian district SP tinte'n mahni bial chhungah police patroling ṭha taka neih chhunzawmti zel a ṭul. Venhimna lama ṭan lak lehzual hian thil ṭha lo thleng tur tam tak a veng thei a, hemi atan hian police mai bakah, khawtlang te, NGO-te leh VDP/JAC/YMA-te nen inzawmna ṭha tak neia thawhho thiam a ngai," an ti.

Kum 2017 khan January-April chhungin DIG (Northern Range) chhung­ah thubuai 705 ziah luh a ni a, kumin January-April chhungah thubuai 675 ziah luh a ni.