Tripura-a Bru-te vote thlakna turah ECI aṭangin thu dawn a la awm lo

Tripura refugee camp-a Bru awm Mizorama electoral roll-a chuangte'n Tuirial bial MLA by-election neih huna vote an thlakna hmun turah Election Commission of India (ECI) chuan thutlukna a la siam lo.

Vanglaini palai zawhna chhangin Election dept. hotute chuan Bru-te vote thlak dan turah ECI aṭangin thu dawn an la neih loh thu an sawi a, "Tripura-a Bru-te hi Mizoram chhunga an awmna polling booth ngeia vote thlak tir tura ngenna ECI hnenah Tuirial bial MLA by-election hun tur puan hma leh puan hnuah pawh kan thlen tawh a ni," an ti.

Election dept. hotute chuan Bru-te chungchangah hian political party-te ngaihdan pawh an lak thu sawiin, "An president ṭheuhte'n lehkha rawn thehlutin, Mizoram chhunga an awmna polling booth-ah ṭheuh vote thlak tir an duh vek a ni," an ti a, political party leh NGO-te duhdan pawh ECI hnenah an thlen thu an sawi.

Inthlan huna vote thlak hun chhung turah ECI chuan zan dar 6 thleng vote thlak a remtih tawh thu sawiin Election dept. hotute chuan, "CEO-in vote thlak tur zingah 7th Day kohhran zawmtute engemawzat an awmve avangin vote thlak hun tur hi tlai dar 5 aṭanga zan dar 6 thleng pawh sei a dil a, hei hi ECI chuan rem an ti tawh a ni," a ti.

Ministry of Home Affairs (MHA) bultuma, Mizoram sorkar, Tripura sorkar leh Bru pawl aiawhte inbiakna anga Mizorama Bru-te Tripura-a hruai kir an nih hnuah pawh Mizoram electoral roll aṭanga paih an la ni chuang lo.

Vanglaini palai zawhna chhangin Central YMA president Vanlalruata chuan Tripura-a Bru awmte Mizoram electoral roll aṭanga paih an nih theihna atan hma an lak reng thu sawiin, "Mizoram sorkar pawhin hma an la ve reng a ni. Mah se, ECI lam hian MHA lamin displaced people an nihna an hlih hma chu paih theih an ni lo an ti tlat. MHA lam pawh kan nawr reng a, an che chak lo a ni," a ti.

Tarlan tawh angin CYMA executive committee October 2, Inrinnia ṭhukhawm chuan Tuirial bial MLA by-election lo awm turah Tripura refugee camp-a Bru awm Mizoram electoral roll-a chuangte'n vote an thlak theihna atana a bika ruahmanna siam sak ṭha an ti lo.

CYMA ṭhukhawm chuan, "Anmahni duh thua Tripura-a tlan thla Tuikuk Mizoram electoral roll-a chuang mekte an roll chuanna hmun polling booth-ah ngei vote an thlak theihna tura hmala turin election buaipuitute kan ngen. Tuikuk Tripura-a an duh thu ngeia tlan thlate tana vote an thlak theihna tura a bika ruahmanna (special arrangement) siam sak ṭha kan ti lo," an ti.

Tripura refugee camp-a Bru vote thlak turte sorkar sensoa hruai khawm an nih lohna atan CYMA chuan Mizoram sorkar an ngen a ni.