UPC (M) ṭhalai rorel inkhawm

Mizoram UPC koh­hran ṭhalai pawl, General Pentecostal Youth Depart­ment chuan, Covid-19 avanga inkhawm­pui lian an neih theih loh avangin nimin khan a aiawhin rorel inkhawm Dinthar biak-inah an nei.

Rorel inkhawm hi General PYD president Upa Vanneia Pudaite-in kaihruaiin, Mizoram UPC Puipate'n an telpui. Executive chairman Upa C Lalropianga'n rorel turte Pathian hnenah hlanin, treasurer Rev. PB Lal­hmuliana kaih­hruaiin member boralte sunna hun hman a ni.

Kum 2025 inkhawmpui lian chu Kawrthah bialah nghatin, inkhawmpui thlengtu puih nana member tin thawhkhawm leh conference fund tih san niin, inkhawmpui neih loh kuma rorel palai zat pawh tihpun a ni.

An thurel ṭhenkhatte chu General PYD hmalak­na a blood donation camp buatsaih te, career guidance booklet siam te, seminar paper buatsaiha zir te, Bible quiz buatsaih te, social work neih chungchang te, live crusade buatsaihte leh rampum huapa chawnghei ṭawngṭai neihte a ni.

Tun dinhmunah Mizo­ram UPC kohhran ṭhalaiah hian member 11643 an awm.