Faina Hapta khar a ni

Aizawl Municipal Corporation (AMC) chuan nimin khan Chanmari YMA Hall-ah October 2 aṭanga hman ṭan Faina Hapta, 2021 kharna hun an buatsaih a, deputy chief minister Tawnluia'n a hmanpui.

Tawnluia chuan dan angin Faina Hapta chu khar ni mah se, faina kawnga bul ṭanna niah hmang ṭheuh turin kalkhawmte a chah a, "Faina leh thianghlimna lam hawi hmasawnna rahbi thara min hlang kaituah kan hmang tur a ni," a ti a, AMC in bawhhlawh thliar leh sawngbawl kawngah nasa takin ṭan a lak mek thu sawiin, faina leh thianghlimna kawnga hma sawn zel turin mipui a sawm bawk.

Aizawl mayor Lal­rinenga Sailo pawhin thu sawiin faina kawng­ah Aizawlin hma a sawn hle tih a sawi a, "Hual­ngohmunah bawlh­hlawh sawngbawlna hmun siam tum a ni a, sum pawh dawn a ni tawh," a ti a, sorkarin AMC hnenah Tuiriala bawlhhlawh sawngbawlna tur incinerator lian chi a pek tawh thu a sawi.

Faina Hapta intih­siakna hrang hranga lawmman te sem a ni a, thlalak intihsiakah B Lallawmkima, Zotlang; video tawi insiamsiakah Lalrindiki Ralte, Tui­khuahtlang leh chan­chinbuah Virthli Daily-te pakhatna an ni.