Hnam dangin rod teh tling lo an lalut nasa: AMCIRDA & MCEA

Mizoram Civil Engi­neers' Association (MCEA) leh All Mizoram Cement & Iron Rod Dealers' Association (AMCIRDA) chuan, nimin khan Aizawl Press Club-ah thuthar thehdarhtute kawmin, Mizo hming hawha hnam dang dawrkaite'n rod a diameter tling lo, rod size te leh zang an lakluh nasat thu an sawi.

AMCIRDA hruaitute October 4, 2021 khan Legal Metrology leh MCEA-te nen rod an endik thu sawiin, "Rod len zawng a tling lo nasa hle tih hmuhchhuah a ni. Durgapur rod kan tih ho hi company lam chuan light weight tiin an sawi mai ṭhin a, chung light weight kan tih ho zinga company pathum SMS Durgapur, Megaturbo Durgapur leh Trishakti Durgapur hote kan endikin a len zawng tur an tling lo," an ti.

Rod size tling lo hmanga in sak chu a him lo tih sawiin AMCIRDA hruaitute chuan, "Chhiatna lian zawk thlen thei a nih bakah inbumna thang ṭha tak a nih avangin ram leh hnam hmangaihna avanga theihtawp kan chhuahna hi sorkar lam hian min bengkhawn se," an ti a, Bureau of Indian Standards-in a phal chin aia te chu Mizoramah lakluh khap nise an duhthu an sawi.

AMCIRDA hruaitute sawi danin, tun hnaiah hnam dang dawr Mizoram sorkara chhiah cheng khat pawh pe lo, duh thala sapa tal ngam an pung chak hle a ni. Chungho chuan kan ram sum leh pai an rut hiau hiau a ni. Lailapur leh Bagha lama hnamdang sumdawngte'n harsatna nei miah loin Mizoram chhungah bungrua an rawn chaw lut a, way bill nei loin, state dang GST hmangin rod, cement etc. an rawn phur lut a ni.

MCEA hruaitute chuan tunhma chuan kan rod hman ṭhinah rod size tling loah harsatna kan tawk ngai lo tih sawiin, "A sei zawnga tling lo kha kan buaina a ni zawk ṭhin. Mipuite'n rod buk tling lo a tam tih hriain, a rih zawng ni loa, a tlawna lei kan intihhmuh ṭan aṭang khan rod size tling lo hi a rawn tam chho ṭan ta a ni," an ti.
Insakte a him nan leh a dam hun chhung tur a thlen theihna atan uluk takin engineer-te'n rod hman ngai zat, a phan dan tur leh a phuar dan tur rod size mila an design ṭhin thu sawiin MCEA hruaitute chuan, "Rod size tling lo avang hian building structure-in chakna a neih tur ang a neih phak loh phah," an ti a, rod size tling lo hman chuan in sak a him loh phah dawn thu an sawi.

Zawhna chhangin MCEA leh AMCIRDA hruaitute chuan rod size tling lo hi harsatna awm loa Mizoramah phurh luh reng theih a nih thu sawiin, "Khawiahmah endik a ni ngai lo. Kan Legal Metrology-te an indaih lo hle a, tuna awmzat hi kan duhkhawp lo," an ti.