Hmun hrang hrangah Faina Hapta khar
Nimin khan October 2 aṭanga hman ṭan Faina Hapta chu Mizoram hmun hrang hrangah khar a ni a, hapta puala inelna buatsaih chi hrang hranga ti ṭhate hnenah lawmman sem nghal a ni.
Lunglei
Lungleiah chuan Lunglei South bialtu MLA Dr K Pachhunga hoin Convention Centre hall-ah khar a ni. Dr K Pachhunga chuan pawnlam faina mai bakah chhung lam rilru thianghlim leh hrisel neih a ṭul thu leh mipuite'n sorkarah engkim beisei fai vek loa mahni tihve theih chin tihve chu hmasawnna thlentu a nih ṭhin thu a sawi.
Kharna inkhawmah hian Faina hapta puala thlalak leh video tawi insiamsiak lawmman sem a ni a; thlalak intihsiakah Sangtea Tlau leh video tawi insiamsiakah C Lalhmangaihzuala te chu pakhatna an ni.
Champhai
Champhaiah chuan Horticulture Complex, New Champhai-ah district bawrhsap Maria CT Zuali hoin Faina Hapta kharna hun hman a ni a, faina kawnga hmalakna chu hapta zawh hnua tawp mai loin kumtluana hman tur a nih thu a sawi.
He hunah hian Faina Hapta puala intihsiakna hrang hrang lawmman sem a ni a, veng fai berah Zote; office fai berah District Treasury Office; sikul fai berah Champhai HSS; faina chungchanga chanchinbu ti ṭha berah Lenrual Newspaper; restaurant fai berah BSP Restaurant, Vengthlang; hotel fai berah Hotel Hranga Plaza, Vengthlang; bazar fai berah Bethel Bazar; hospital fai berah DM Hospital; thlalak intihsiaka ti ṭha berah Zosangzuala, Vengthlang leh video tawi insiamsiaka ti ṭha berah Lalhruaitluangi, Venglai te thlan an ni.
Kolasib
Kolasib IPR conference hall-ah bawrhsap Dr H Lalthlangliana kaihhruaiin Faina Hapta 2021 kharna hun hman a ni a, Faina Hapta chhunga inelna hrang hrang buatsaiha tiṭhate hnenah lawmman a sem nghal.
Kolasib district veng fai inelnaah pakhatna chu Rengtekawn a ni a; zirna-in fai berah Rengtekawn H/S; office fai berah District Sericulture Office; restaurant & hotel fai berah Rallian Restaurant, Venglai; hospital/healthcare facility fai berah Nazareth Nursing Home leh video tawi insiamsiaka ti ṭha berah Dr Hmingthanzuala, Project Veng te thlan an ni.
Serchhip
Serchhip DC conference hall-ah bawrhsap Kumar Abhishek hoin Faina Hapta kharna hun hman a ni a; Faina Hapta chu tawp mah se, district fai inelna neih zui lehnghal a nih avangin mi tinte theihtawp chhuah zui zel turin a sawm.
Faina Hapta chhunga inelna hrang hranga lawmman sem a ni a; ni tin chanchinbu faina lam hawi thuziak tama ti ṭha ber chu Serchhip Times a ni a, thlalak intihsiakah B Vanlalṭhazuala leh video tawi insiaksiakah Vanlalhruaizelate pakhatna an ni.
Mamit
Mamit DC Dr Lalrozama chuan DC conference hall-a Faina Hapta kharna hun a hmanpui a, Mizoram pum huap fai inelnaah lawmman la ngei tura mahni zawn ṭheuha ṭan lak a pawimawh thu a sawi.
Mamit khawpui chhung veng fai berah Mamit Bazar Veng; thlalak intihsiakah Darthanmawia Chhangte, Kawrthah leh video tawi insiam siakah Zorina Fanai, Zawlnuam chu pakhatna a ni.
Khawzawl
Khawzawla Faina Hapta kharna chu Zuchhip Branch YMA Hall-ah DUDO Ngurthansanga kaihhruaiin hman a ni a, khawlai leh tui luankawra bawlhhlawh paih leh chil chhak te chu dan bawhchhiatna a nih vek tawh avangin mi tinte fimkhur thar ṭheuh turin a chah.
Faina Hapta puala intihsaikna hrang hrang lawmman sem a ni a - photography inelna huangah F Vanlalpeka, Zaingen Veng chu pakhatna a ni a; video tawi insiamsiakah Chuailo SHG, Zaingen Veng chu pakhatna a ni bawk. Khawzawl district-a Faina Hapta No Tolerance Day khan Khawzawl Solid Waste Management Bye-Laws 2020 bawhchhia mi parukte chu pawisa chawi tir an ni.
Hnahthial
Hnahthial district Faina Hapta 2021 kharna chu additional DC Saizikpuii kaihhruaiin hman a ni a, kumtluana faina kalpui chhunzawm turin khawtlang hruaitute a chah.
Faina Hapta puala Hnahthial district-a thlalak leh video tawi siam intihsiakna a ti ṭha thlan chhuah mi pathum ve ve te hnenah lawmman sem a ni a, phut let nei loa tunhma aṭanga vantlang hmun hma tihfai hna kalpui rengtu PC Lalmuansanga, H Lalremruata leh PC Thanghlira, Hnahthial Electric veng vek te hnenah chawimawina thuziak leh Rs. 1000 ṭheuh hlan a ni bawk.