KHAWTHLIR
Test loh tur
Health secretary R Lalramnghaka chuan nimin khan notification ti chhuakin damlo serious casualty/emergency ward pante'n medical treatment an dawn vat theihna atan Covid-19 an kai leh kai loh test loh tur a nih thu a tarlang.
Presbytery khawmpui
Mizoram Synod hnuaia inkhawmpui lian ber dawttu, Presbytery Inkhawmpui chu nimin khan hmun hrang hrangah ṭan a ni. Hripui leng avangin Presbytery inkhawmpui hman dan a inang lo a, nimina rorel ṭan an awm laiin, vawiina rorel tan tur an awm a; kohhran upa nemngheh pawh vawiina ti tur an awm laiin, naktuk Pathiannia ti tur an awm bawk. Mizoram Synod hnuaiah hian Presbytery 41 a awm a, chung zinga 40 chu Mizoram chhunga mi a ni.
Thisen pe
Lunglei District PYD (NEI) conference-in blood donation neih nise tia a lo rel bawhzuiin hqrs. bial PYD-te chuan nimin khan Lunglei Civil Hospital tan thisen unit 24 an pe a, thisen petute hi mipa vek an ni. Nimin vek khan Biakchhunga tu leh fate chuan Chawnpuia Biakchhunga inah thisen pek an huaihawt a, Civil Hospital, Aizawl tan thisen unit 17 an pe a, petute mipa 16 leh hmeichhia pakhat an ni.
Mizo sipaite tlawh
Human Resources Development board vice chairman L Thangmawia, MLA chuan nimin khan Mizo 3rd IR Battalion Headquarters, Mangaldoi, Assam a tlawh a, games & sports tournament atan Rs. 10,000 a pe.
Power supply awm dawn lo
Power & Electricity dept. chuan hriattirna tichhuakin, vawiin chawhma dar 11:30 aṭanga chawhnu dar 2 thleng 132 Kv, Luangmual Sub Station-ah hnathawh a nih dawn avangin Vaivakawn a chin tlak lam zawng, Bawngkawn Veng ṭhenkhat, Chaltlang Veng ṭhenkhat, MZU, PGCI, high court, Central Jail Veng, Luangmual leh Zotlangte'n hnathawh hun chhungin power supply an hmuh dawn loh thu an tarlang.
Covid-19 vangin mi pahnih thi
October 7, Ningani tlai dar 5 aṭanga nimin tlai dar 5 thleng khan Mizoramah Covid-19 vangin mi pahnih an thi a, Mizoramah Covid-19 vanga thi mi 344 an awm tawh. N Vanlalsanga (59), New Colony-I, Siaha chu October 7, Ningani zan dar 8:20 khan DCHC, Siaha-ah a thi a, natna dang nei tel a ni. Ningania inentir tura damdawi-ina a kalnaah hri a kai tih hmuh chhuah a ni a, hemi ni vek hian a thi zui a ni. Nimin zing dar 1:45 khan Siamliana (89), Zemabawk chu ZMC-ah a thi a, natna dang nei sa a ni. October 4 khan hri a kai tih hriat chhuah niin October 5 khan ZMC-ah admit a ni.
Puanṭhui zirna buatsaih
PMVDY hnuaiah nimin khan Kawrthah khuaah VDVK Level Advocacy Programme, Entrepreneurship and Skill Development Programme Training buatsaih a ni a, Mamit district cooperative officer Lalthangfala'n a hawng. Training hi hmeichhia puanṭhui lama tui mi 300-te tana buatsaih a ni a, nimin khan a batch khatah mi 40 an tel.