Kar khat awh Mizo ṭawng zirhona nei ṭan

Saitual College Mizo department chuan nimin aṭang khan 'One week international webinar on discourse on Mizo language' an buatsaih ṭan a, Human Resource Development (HRD) board vice chairman L Thangmawia, MLA in a hmanpui.

L Thangmawia chuan Chief Minister duh dan angin Mizo Language Board din tura hmalakna chak taka kalpui mek a nih thu a sawi a,"Mizo ṭawng hi hmanlai leh tun hma-a hman dan thuah leh hriat dan inan loh avanga thu inchuh awmah leh ṭawng dang (foreign language) Mizo ṭawnga dah leh sengluh chungchangah Language Board din a nih hunah chuan thu laitan theitu tur a ni tawh dawn," a ti a, UNESCO in Mizo ṭawng chu ṭawng ral thei dinhmunah dah pawh nise a ral lohna tura hmalak a ngaih thu a sawi.

Kar khat awh Mizo ṭawng zir hona hunah hian Mizoram chhung leh pawna college leh university-a ṭawng lama mi thiam hrang hrangte bakah UK, USA leh Myanmar lama mithiam sawm bikte'n thupui thlan chhuahte an sawi dawn a; ṭawng bulṭhut leh ṭawng zirna chungchang leh a pawimawhna te, zirna-ina Mizo ṭawng zirtir dan tur te, ṭawng leh economy bakah identity leh ṭawng chungchang te, Tripura, US, UK leh Myanmar lama Mizo ṭawng dinhmun leh hmathlir chungchang bakah, Biate ṭawng dinhmunte zirho a ni ang.

Webinar hi October 13, 2021 thleng zan tin dar 7-ah neih ṭhin a ni dawn a, MS Academy youtube channel-ah en theih a ni ang.