COVID-19: Mizoram dinhmun ; Hri vei 1,080 hmuh belh

October 7, Ningani khan Mizoramah Covid-19 vei mi 1,080 hmuh chhuah a ni a, nimin khan tlai dar 5 thleng khan hripui vei dam tawh mi 712 chhuahtir an ni.

Covid-19 vei hmuh thar te chu mipa 485 leh hmeichhia 595, an vaiin mi 1,080 an ni a, an zinga mi 476 (44.07%) in symptoms an nei.

October 7, Ningani khan Mizoramah sample 8,382 endik a ni a, hri vei hmuhchhuah thar 1,080 te hi ZMC laboratory-a hmuh 308, TrueNAT hmanga hmuh 56, RAT hmanga hmuh 690 leh Fluorescent Immunoassay (FIA) hmanga hmuh 26 an ni.

Nimin zinga sorkar laipui report-in a tarlan danin Mizoram chu India ram state/UT hrang hrang zinga hri vei hmuh chhuah tam lamah pali-na a ni a, hmarchhak state pariat zingah hmuh tam berna a ni chhunzawm zel.

IDSP record angin, Mizoramah Covid-19 vei 1,03,709 hmuh chhuah a ni tawh a, mipa 50,949 leh hmeichhia 52,760 an ni. Nimin tlai dar 5 thleng khan mi 87,860 (84.71%) chhuahtir an ni tawh a, mi 344 (0.33%) thi tawhin, enkawl mek mi 15,505 (14.95%) an awm.

Ningani khan hmarchhak state pariatah hri vei 1,671 hmuh chhuah a ni a, heng zinga 1,080 (64.63%) chu Mizorama hmuh chhuah a ni. India ram pumah Mizoram aia hri vei hmuh chhuah tamna state pathum - Kerala (12,288), Maharashtra (2,681) leh Tamil Nadu (1,390) te chiah an awm.

Nimin khan tlai dar 5 thlengin Mizoramah hripui vei dam tawh mi 712 chhuahtir an ni a; Aizawl district-ah mi 521, Lunglei district-ah mi 22, Champhai district-ah mi 37, Kolasib district-ah mi 16, Lawngtlai district-ah mi 51, Mamit district-ah mi 49, Khawzawl district-ah mi parasih, Hnahthial district-ah mi pali leh Saitual district-ah mi panga an chhuak.

Mizorama Covid-19 hri vei hmuh chhuah tawh zawng zanwg 1,03,709 chu kum 2011 chhiarpui aṭanga chhûtin mi 1,000 zelah hripui vei mi 94 an awm ang a ni a; mi 1,00,000 zela Covid-19 vangin mi 31 an thi tawh ang a ni bawk.