Mizorama Covid-19 darh mek zir chiangtute'n Champhai leh Zokhawthar dinhmun an zir

Sorkar laipuiin Mizorama Covid-19 hripui darh mek zir chiang tura a rawn tirh, Multi Disciplinary Covid-19 Study Team chuan October 9, Inrinni khan Champhai khawpui leh Indo-Myanmar ramri dep khua Zokhawthar an tlawh a, Covid-19 hri leng dinhmun an zir chiang.

Imphal Regional Office for Health & Family Welfare (ROHFW) senior regional director Dr L Ashananda Singh kaihhruai central team hian, Zokhawthar an tlawhnaah hian ramri kânte uluk taka screening neih leh Covid-19 hri vei hmuh chhuahte genomic sequencing tih a, eng Covid variant chiah nge tih finfiah tura hmalak a ṭul thu an sawi.

Champhai CMO pisaa hri leng dona kawnga hmalak dan hrang hrangte an enfiah a, thawktute an kawm nghal. Central team-te hian test kalpui dan, thawktu leh hmanraw neih dan contact tracing kalpui dan, hri vei enkawlna hrang hrang dinhmun, oxygen dinhmun, vaccine pek kalpui dan, CAB-in zawm a hlawh leh hlawh loh leh ṭul dangte an zir chian bakah, Covid hri veite enkawlna hmun an tlawh.

Central team-te hi IDSP nodal officer Dr Pachuau Lalmalsawma, Champhai CMO Dr R Lianmawia leh DIPRO Dr Lallawmkimate'n an ṭawiawm a ni.

Multi Disciplinary Covid-19 Study Team member rawn kalte hi Imphal ROHFW senior regional director Dr L Ashananda Singh leh Dr RK Priyabarta Singh, National Centre for Disease Control, Delhi-a consultant epidemiologist Dr Vinita Gupta leh Dr Varun Singh-te an ni.