Political party chi hnih an awm - tla mai tur party leh tling thar tur party - K Sapdanga

ZPM chuan Tuirial bial MLA by-election lo awm tur atan Inrinni khan Hortoki-ah campaign office hawnna hun an buatsaih. A hawngtu ZPM working president K Sapdanga chuan political party chi hnih, tla mai tur leh tling thar tur party an awm thu sawiin ZPM chu mi ṭha tak takin tun hnaiah an zawm nasat thu a sawi.

K Sapdanga chuan, "Political party hi chi hnihin an ṭhen a, chu chu tla mai tur leh tling thar tur party a ni. Mithiam rual ṭhahnem takin ZPM party an zâwm ruih ruih a, kan sâwm pawh ni miah loa an rawn lut reng maite hi kan ṭhat leh fel vang pawh a ni loa, kalphung thar nêna kan ram hruai ṭhat theih an beisei vang a ni," a ti.

ZPM working president chuan party dangin an neih ve loh Val Upa Council (VUC) an neih thu sawiin, "Hêng kan val upate hi mi thiam tak tak an ni a, party-ah hlâwkna beisei miah loa rawn inpete an ni. Heng kan val upate hian kan sorkar hunah kan tam hruaitute kal sual tur an veng dawn. Kan ram siam ṭha tur chuan thil pathum kan mamawh a, dikna, rinawmna leh huaisenna te an ni. Dikna leh rinawmnate a dinchan theihna tur chuan kan huaisen a ngai,” a ti.

Inthlan lo awm turah an hotute'n mi ṭha tak an thlan chhuah thu sawiin ZPM Working President chuan, "Ani hi he lai bial hre chiangtu leh a theihtawpa khawtlang tana hnathawk ṭhin a ni. He lai bialtu kan sûn tak Pu Andrew-a sulhnu chhui zo thei tur mi ṭha tak kan nei thei hi kan vannei hle a ni. Party dangte'n kan lusunnate hria a, tawrhpui tûra mi nêm tak tak an rawn chhawpchhuak hi kan lawm em em a ni," a ti a, party dangte chuan Zonunzemawi an lantir thu a sawi.

Campaign office hawnnaah hian ZPM candidate Laltlanmawia leh AMC councillor pahnih - Baryl Vanneihsangi leh Christina Roluahpuii Sailo-te pawhin thu an sawi.