Tuirial bialah hmasawnna hnathawh tur a tam, chumi atan chuan power a ngai - Lalruatkima

MNF chuan Inrinni khan Tuirial bial by-election lo awm tur atan Hortoki-ah campaign office an hawng a, thusawitu MNF adviser Lalruatkima chuan, "He bialah hian hmasawnna hna thawh tur tam tak a awm. Hengte tihlawtling tur hian power a ngai a, chu power chu tunah rih chuan MNF kutah a awm mek," a ti.

Lalruatkima chuan hmasawnna hnathawhna tur power kawl mektu MNF candidate thlang tling ngei tura Tuirial bial mipuite ngenin, "He bial chhunga khaw hrang hrang mamawhte hi kan hria a ni," a ti a, bial mamawhte tihlawhtling turin ruling MLA an neih a pawimawh thu a sawi.

MNF Adviser chuan MNF sorkar hmalakna sawiin, "Zu zawrh vanga khawtlang manganna tih tawp a ni ta. Sikul luh hun Mizo hnam milin siam ṭhat a ni a, lirthei chhiah pek dan siam danglam a ni. Old age pension hlawh leh MR-te hlawh tihpun a ni. Lokayukta din a ni a, mi harsa zawk tan chini sem niin, ramriah buaina a lo awm a, huaisen takin sorkarin kan hmachhawn a, a lawmawm tak zet," a ti.

An party candidate K Laldawng­liana fakin Lalruatkima chuan, "Midang an ṭha lo e ka tihna ni loin, midangte ai chuan Pu K Laldawngliana in lo thlan tlin chuan in inchhir hauh lo ang," a ti a, an party candidate chu NGO hrang hrangah nihna leh dinhmun pawimawh tak tak lo chelh tawh ṭhin leh chelh mek, thil kawng hmang hre tak a nih thu a sawi.